Lajme

Ministrja Reshitaj iu kërkon grave ngritjen e zërit ndaj çdo padrejtësie

Autori: Gazeta inFokus 16:29 | 08 Mars 2018

Ministrja e Ambientit dhe Planifikimit Hapësinor, Albena Reshitaj, në diskutimin “Krijimi i Mundësive të Barabarta” për nder të Ditës Ndërkombëtare të Gruas tha se përfaqësimi i grave në vendimmarje ende mbetet i vogël, shkruan Infokusi

“Ndonëse ka përparime të dukshme, përfaqësimi i gruas në pozita vendimmarrëse mbetet ende i vogël, por kjo nuk duhet të jetë pengesë që ne të mos angazhohemi që të kemi vendin dhe trajtimin e merituar në shoqëri. Historikisht gratë shqiptare kanë dhënë një kontribut të jashtëzakonshëm në shoqërim në edukimin e brezave të rinj. Ky edukim dhe vetëdijesim është imediat edhe sot në ndërgjegjësimin e shoqërisë”, ka thënë Reshitaj.

Ministrja Reshitaj ka kërkuar prej grave që ta ngrisin zërin ndaj çdo padrejtësie që iu bëhet në Ministrinë e Ambientit dhe në institucionet tjera, sepse sipas saj, garat kanë pasur sfida dhe mund më të madh si shoqëri.

-Advertisement-

Ajo shtoi se nuk ka zhvillim ekonomik të mirëfilltë në vend, nëse nuk kanë hapësirë gratë në vendim marrje, dhe për këtë janë këtu që t’iu tregojnë të gjithëve se gratë janë të fuqishme.

“MMPH ka shumë gra profesioniste që kanë vullnet, përvojë dhe gatishmëri për punë, ne do t’u japim hapësirën dhe mundësinë, sepse unë besoj në kapacitetet e tyre intelektuale ne profesionale”, tha ndër të tjera Reshitaj.

Ajo gjithashtu bëri të ditur se Ministria e Ambientit dhe Planifikimit Hapësinor është në proces të hartimit dhe miratimit të Rregullores së re për sistematizimin e vendeve të punës dhe konform dispozitave ligjore do të punoj në ngritjen e nivelit të barazisë gjinore në MMPH. /INFOKUSI/