Fokus

Ministria e Brendshme e Kosovës e mban sekret numrin e azilkërkuesve

Autori: Samire Jaha 13:04 | 28 August 2021

Kosova është në pritje të një kontingjenti refugjatësh nga Afganistani. Hapja e derës për ta është bërë me kërkesë të Shteteve të Bashkuara të Amerikës, shkruan Gazeta Infokus.

Ende nuk dihet saktë se sa do të jetë numri i këtyre refugjatëve, por ministri i Punëve të Brendshme, Xhelal Sveçla, ka paralajmëruar se në Kosovë mund të vijnë deri dy mijë afganë.

Megjithatë, në vendin tonë edhe në të kaluarën janë strehuar afganët.

Ata janë sistemuar në qendrat e azilit. Një qendër e tillë është në Magurë të Lipjanit dhe një tjetër në fshatin Vranidoll të Komunës së Prishtinës.

Por, sa është numri i tanishëm i azilkërkuesve në Kosovë?

Këtë përgjigje nuk e ka dhënë Ministria e Punëve të Brendshme.

Gazeta Infokus ka pritur tri ditë për të marrë një shpjegim nga kjo ministri edhe për koston e shpenzimeve për një azilkërkues, por ky institucion ka heshtur duke i mbajtur sekret të dhënat rreth të huajve që janë strehuar në Kosovë.

Ajo që dihet është se dy qendrat e azilit kanë kapacitet të vogël dhe në kushte optimale mund të pranojnë jo më shumë se 100 persona.

Në një intervistë për REL, ministri Sveçla ka thënë se për ardhjen e afganëve, institucionet e Kosovës po koordinohen rregullisht me aleatët amerikanë në Afganistan, NATO e në Kosovë.

Qëndrimi i personave që do të vijnë nga Afganistani, sipas tij, nuk do të jetë i gjatë pasi Kosova mund t’iu ofrojë atyre mbrojtje të përkohshme në kohëzgjatje prej një viti. /Gazeta Infokus/

Të tjera