Lajme

Ministri i Drejtësisë: Shpejt gjyqtarët fillojnë punën në Veri

Autori: Gazeta inFokus 17:34 | 24 September 2017

Ministri i ri i Drejtësisë, Abelard Tahiri, ka paralajmëruar se shpejt do të nisë puna edhe e gjyqtarëve të Kosovës në Veri të Mitrovicës. Ka thënë se me këtë do të zbatohet në tërësi Marrëveshja e Brukselit për Drejtësi.

“Zbatimi i kësaj marrëveshje është hap shumë i rëndësishëm që shkëputë përfundimisht çdo ndikim të jashtëm në sistemin juridik të vendit dhe si i tillë, është lajm i madh për institucionet, qytetarët dhe të ardhmen tonë të sigurt drejt integrimit në Bashkimin Evropian”, ka thënë Tahiri.

Sipas tij, njëra prej sfidave më të mëdha pas shpalljes së pavarësisë së Kosovës, ishte shtrirja e sovranitetit dhe integrimi i Veriut.

-Advertisement-

“Është punuar shumë në këtë drejtim, po aq sa është punuar shumë që shoqëria shumetnike e Kosovës të ndërtojë një konsensus për të ecur bashkërisht përpara”, ka shtuar ai.

Ai ka thënë se prej tash Kushtetua e Kosovës do të shtrihet në tërë Republikën.

“Sot, situata po ndryshon konkretisht. Shumë shpejt do të zbatohet Marrëveshja e Brukselit për Drejtësi, që krahas Policisë dhe Prokurorisë, edhe gjyqtarët të fillojnë punën e tyre në gjykatat në veri të vendit, që qytetarët e Kosovës pa dallim, të kenë qasje në sistemin e drejtësisë sipas ligjeve dhe rendit juridik të Republikës së Kosovës”, ka shtuar ai.