Lajme

Memli Krasniqi jep detaje për takimin e dytë të partive me presidenten Osmani pas vendimit të Kushtetueses

Autori: Gazeta inFokus 11:45 | 01 Korrik 2025

Kryetari i Partisë Demokratike të Kosovës, Memli Krasniqi, ka konfirmuar pjesëmarrjen në takimin e dytë konsultativ që presidentja Vjosa Osmani pritet ta zhvillojë me liderët e partive parlamentare në përpjekje për zgjidhjen e ngërçit politik dhe konstituimin e Kuvendit, shkruan Gazeta Infokus.

Krasniqi tha se ftesa është pranuar dhe takimi pritet të mbahet nesër, ndërsa ritheksoi qëndrimin e pandryshuar të PDK-së për kompromis dhe zgjidhje institucionale.

“Kemi pranuar ftesën, besoj nesër do të jetë takimi. Qëndrimi është i njëjtë, siç e kemi pasur gjithmonë. Ne që 3 muaj po mundohemi të gjejmë kompromise për të ofruar një zgjidhje,” deklaroi ai para mediave.

-Advertisement-

Takimi vjen në kohën kur Kuvendi ende nuk është konstituuar, pavarësisht vendimit të Gjykatës Kushtetuese që obligon përmbylljen e këtij procesi brenda një afati 30-ditor. PDK ka qenë një nga partitë që ka kërkuar nga Vetëvendosje të reflektojë dhe të krijojë hapësirë për marrëveshje politike që do t’i hapte rrugë zgjedhjes së kryetarit të Kuvendit dhe funksionalizimit të institucioneve.