Pavarësisht se ç’farë do të mund të ndodhë me qeverinë aktuale të Kosovës dhe dëmet e shkaktuara në raport me SHBA-të apo pavarësisht se çfarë qeverie tjetër do të mund të vinte në Kosovë si dhe pavarësisht se çfarë marrëveshje të përkohshme do të kemi me Serbi, zgjidhja përfundimtare e nyjes shqiptaro-serbe do të ndodhë vetëm pas përfundimit të luftës në Ukrainë. Çelësi i të gjithave për zhbllokimin përfundimtar të Kosovës është humbja e Rusisë në Ukrainë.

Dhe, në qoftë se Ukraina në fund të luftës ngelet e paprekur territorialisht, atëherë kjo automatikisht do të thoshte humbje e Rusisë dhe më pas edhe rënie e saj nga skena politike globale, diçka që do të kulmojë edhe me përjashtimin e saj nga Këshilli i Sigurimit. Kjo do t’i hapte rrugë anëtarësimit të Kosovës në OKB.

Rënia e Rusisë e shporr atë nga Pellgu i Detit të Zi dhe sigurisht edhe nga Kaukazi dhe e forcon Turqinë në atë rajon sipas interesave amerikane. Kjo i hap rrugë zgjerimit të NATO-s dhe BE-së sa më afër kufirit rus, nëse jo si NATO e BE, atëherë sigurtë një formacioni tjetër perëndimor të drejtuar nga SHBA me Poloninë në qendër bashkë me Ukrainën, Çekinë, Sllovakinë, Hungarinë, Rumaninë e Bullgarinë, shtete këto ku SHBA është duke i vendosur bazat ushtarake.

Ndërsa, çdo ndarje e Ukrainës, do të mund të thoshte ndarje edhe e veriut të Kosovës dhe bashkim të pjesës tjetër me Shqipëri. Por, ndarja e Kosovës pashmangshëm që do ta ndante dhe Bosnjen e Hercegovinën e Maqedoninë e Veriut, diçka që automatikisht do të çonte në luftë përmasash rajonale, për çfarë s’ka interes asnjë interes BE e as SHBA. Prandaj, synimi i Perëndimit do të jetë ruajtja e tërësisë territoriale të Ukrainës dhe me këtë futja nën kontroll e Pellgut të Detit të Zi me Turqinë të forcuar si portë e Perëndimit kundrejt Lindjes së Mesme.

Shikuar peshën artificiale që Rusia ende ka në glob, e të cilën e ka në shpërputhje me performancën, kapacitetet ekonomike dhe mundësitë që mund t’i ofrojë në zhvillimet e ardhshme rajonale e globale, jam i bindur që SHBA do ta mundë bindshëm Rusinë në Ukrainë dhe ta ç’rangojë atë ndërkombëtarisht. Një fitore e plotë e Ukrainës kundër Rusisë, do të jetë goditje para se gjjthash dhe për Serbinë, e cila me një Rusi të rënë s’do të ketë më asnjë mundësi ndarjeje të Kosovës e aq më pak destabilizim të rajonit. Plakja e popullsisë dhe rënia brutale demografike në Evropë dhe Rusi do të jenë faktori kryesorë zbehës e dekurajues ndaj çfarëdo lufte të ardhshme në Ballkan apo Kaukaz si dy zonat më të nxehta në Evropë.

E deri në përfundimin e luftës në Ukrainë dhe sigurisht edhe më pas, Kosova duhet të bashkëpunojë pa kushte me SHBA e mos ta etiketojë bashkëpunimin me të si bashkëpunim me Grenell, Escobar apo Hill, por vetëm si bashkëpunim me politikën shtetërore të SHBA-së përballë nesh, rajonit, BE-së dhe globit.

Nuk duhet të harrojmë asnjëherë konsistencën e SHBA-së në të mirë të popullit shqiptar duke filluar nga: 1) Bërja e Shqipërisë shtet për herë të parë në histori; 2) Caktimi i vijës së kuqe ndaj Millosheviqit nga Xhorxh Bushi i Vjetër që nëse prekte Kosovën do të ballafaqohej me pasoja; 3) Çlirimi i Kosovës nga Bill Clinton; 4) Bërja e Kosovës shtet për herë të parë në histori dhe futja e Shqipërisë në NATO nga Xhorxh Bushi i Ri; 5) Bërja e Ushtrisë së Kosovës dhe hapja rrugë e investimeve në Shqipëri drejt trojeve shqiptare nga Donald Trump; dhe 6) Zhbllokimi ndërkombëtar i Kosovës nga Xho Biden bashkë me pastrimin e Shqipërisë, Kosovës, rajonit dhe Evropës nga elementi rus.

Gazetaria Digjitale – Profesioni i së ardhmës

Sponsoruar