Shëndetësi

Marrja e ilaçeve rrit gjasat e prekjes nga depresioni

Autori: Gazeta inFokus 23:34 | 15 June 2018

Një e treta e amerikanëve, që marrin medikamente me apo pa recetën e mjekut, janë më shumë të predispozuar për t’u prekur nga depresioni, paralajmëron studimi i publikuar në “Journal of the American Medical Association” (JAMA).

Pilula kontraceptive, ilaçe për qetësimin e dhimbjeve, për zemrën apo kundër djegieve të stomakut.

-Advertisement-

”Shumë persona do të habiten kur të mësojnë se medikamentet e tyre, megjithëse nuk kanë asnjë lidhje me humorin, ankthin apo çdo lloj gjendje që lidhet me depresionin, mund të rrisin rrezikun për të patur simptoma depresive dhe të çojnë në një diagnozë të depresionit”, sipas autores kryesore të studimit, Dima Qato, pedagoge në Universitetin e Illinois në Çikago. Hulumtuesit zbuluan se rreziku i depresionit ishte më i lartë tek personat të cilët marrin më shumë se një medikament duke llogaritur depresionin në mesin e efekteve të mundshme anësore.

”Rreth 15% e personave të rritur të cilët marrin njëkohësisht tre apo më shumë prej këtyre medikamenteve preken nga depresioni gjatë marrjes së medikamenteve, krahasuar me vetëm 5% të atyre që nuk marrin asnjë medikamnet dhe 7% të atyre që marrin një medikament”, sipas studimit.

”Fakti që kutitë apo fletëpalosjet udhëzuese të këtyre medikamenteve nuk përmendin ndonjëherë paralajmërime në lidhje me këtë çështje është vërtetë problematike”, sipas hulumtuesve. Studimi i bazuar në vëzhgimin, mbështetet në të dhënat e një sondazhi të kryer në një target grup me rreth 26 00 persona të rritur nga viti 2005 në 2014, të mbledhura në kuadër të një sondazhi kombëtar për shëndetin dhe mënyrën e të ushqyerit (National Health and Nutrition Examination Survey). Shkencëtarët paralajmëruan se kjo qasje nënkupton se konkluzionet nuk mund të nxirreshin mbi marrëdhëniet shkak-pasojë, duke theksuar se pyetësorët nuk merrnin në konsideratë zanafillën e depresionit. Por, për Allan Young, drejtor i Qendrës për Çrregullimet Emocianale në King’s College në Londër, i cili nuk është i përfshirë në studim, shprehet se këto zbulime janë serioze.

”Kjo konfirmon faktin e njohur se këto medikamente mund të shkaktojnë depresionin tek disa persona, dhe duhet të jemi të kujdesshëm për të identifikuar dhe më pas kuruar depresionin”, thotë ai.

Subscribe në YouTube: GAZETA INFOKUSI