Maqedonia e Veriut ka konfirmuar ditën e sotme një tjetër mutacion të coronavirusit, por që nuk është i ngjashëm me variantin e ri të virusit, i cili u zbulua në Britaninë e Madhe.

Lajmi është bërë i ditur nga Ministri i Shëndetësisë, Venko Filipçe. Ministri ndër të tjera ka theksuar se format e reja, të detektuara nga laboratorët e Akademisë së Shkencave nuk paraqesin rrezik shtesë për qytetarët.

“Që nga stina e verës (2020), tek ne janë zbuluar gjashtë apo shtatë mutacione gjenetike në Laboratorin e Akademisë së Shkencave dhe Arteve të Maqedonisë së Veriut. Nuk janë të ngjashëm me variantin e ri të koronavirusit të ri në Britani të Madhe”, theksoi Filipçe.

Sa i përket vaksinave të para antiCOVID, sipas Ministrit të Shëndetësisë ato pritet të arrijnë në vend pas dy javësh.

“Vaksinat tani më janë rezervuar për vendin tonë dhe bazuar në dinamikën e shpërndarjes presim që dozat e para të arrijnë në shkurt. Sipas planit të kompanisë Pfizer, me rritjen e kapaciteteve të tyre prodhuese dhe të kompanive tjera që janë pjesë të programit “COVAX” unë besoj se pas muajit shkurt do të kemi një proces të shpërndarjes gjithkund dhe me një dinamikë të vazhdueshme”, ka deklaruar Filipçe.

Një tjetër lajm i mirë është dhënë për shtetasit maqedonas. Ministri gjithashtu ka njoftuar për lehtësimin e masave shtrënguese pas 21 janarit. Restorantet dhe lokalet do të punojnë deri në orën 21:00, në vend të orës 18:00 që janë duke punuar aktualisht.