Lajme

MAP-i shpërblen me tender kompaninë e papërgjegjshme

Autori: Gazeta inFokus 11:49 | 21 June 2017

Zyra Kombëtare e Auditimit ka gjetur shumë shkelje gjatë auditimit të pasqyrave financiare për ministrinë e Administratës Publike (MAP)

Te kontrata ”Renovimi i ish ndërtesës së bankës së Lubjanës”, me vlerë 99,854 euro, operatori fitues nuk i kishte përmbushur kriteret e përcaktuara në dosje dhe në njoftimin për kontratë, raporton infokusi.com.

Sipas ZKA-së kriter i vendosur nga Autoriteti Kontraktues ishte që operatori duhet të ketë qarkullim për tri (3) vitet e fundit një shumë prej 250,000 euro dhe që vlera e kontratave në lëmin e ndërtimtarisë në tri vitet e fundit duhet të jetë 200,000 euro.

-Advertisement-

Por, operatori fitues nuk i kishte plotësuar kriteret e përcaktuara.

“Për tri (3) vitet e fundit kishte qarkullim në vlerë prej 215,063 euro, dhe vlera e kontratave të ofruara prej tij ishte 140,883 euro. Ndërsa, në anën tjetër Operatori i cili ishte me çmim me të lirë për 414€, ishte shpallur si i papërgjegjshëm, sepse nuk e kishte plotësuar kriterin, për noterizimin e diplomës. Shmangiet kishin ndodhur në procesin e vlerësimit të ofertave, në të cilin operatorët nuk ishin trajtuar në mënyrë të barabartë. MAP paraprakisht kishte realizuar me të njëjtin operator një kontratë në vitin 2016 e cila e përmbushte kriterin e kërkuar. Megjithatë, ky vit nuk ishte kriter i kërkuar në dosje dhe në njoftimin për kontratë. Rreziku Prania e dukurive të tilla gjatë procesit të vlerësimit mund të dëmtojnë objektivitetin dhe të shpërblehen me kontratë OE jo meritor”, thuhet në raportin e ZKA-së, raporton infokusi.com.

Sipas auditorit kjo mund të sjellë në pikëpyetje cilësinë e shërbimeve apo produkteve të pranuara për paranë e dhënë.

“Ministri duhet të siguroj përmes menaxherit të prokurimit se procesi i vlerësimit është në harmoni të plotë me kriteret e vendosura dhe trajtimi i operatorëve është i njëjtë. Një mbikëqyrje të procesit të vlerësimit para nënshkrimit të kontratës duhet ta siguroj edhe vetë menaxheri i prokurimit”thuhet në raport, raporton infokusi.com / INFOKUSI

Subscribe në YouTube: GAZETA INFOKUSI