Shkruan: Agron Hoti

Pushtetet e kaluara kanë bërë punë që s’përsëritet më në histori siç ishte çlirimi, rindërtimi, pavarësimi dhe shtetndërtimi nga A-Zh i Kosovës, por në vazhdimësi u ka munguar propaganda përkatëse për reklamimin e punës së bërë.

Ato shkonin sipas motos “puna e mirë, shihet vetë”, por harronin që kishin mbi shpinë një aleancë të fuqishme të prirë nga Serbia e Rusia me ca aleatë orientalë e evropianë dhe një armatë të tërë kinseshqiptarësh brenda Kosovës dhe në diasporë që s’linin gurë pa lëvizur duke propaganduar kundër gjithë kësaj pune dhe duke e quajtur të tërën “shkatërrim”, sepse qëllimi i Serbisë dhe Rusisë ishte dhe vazhdon të jetë madhor: Kosova, si projekt amerikan, duhej të paraqitej si e shkatërruar dhe dështuar.

Kështu që, pushteti sado që punon, pa propagandë bie, edhe atë palavdishëm, sidomos kur gjendet përballë një inxhinieringu brutal propagandues vendor dhe ndërkombëtar që për synim kishte zhbërjen e shtetit të Kosovës dhe gjithë atyre që e bënë atë.

Pushteti aktual tërë fuqinë e tij e ka përqendruar në propagandë dhe vetëm propagandë, pa e kryer as edhe një punë të hajrit. Pushteti aktual e pati kapitalizuar edhe tërë atë propagandë të Serbisë dhe Rusisë me ca aleatë të tyre orientalë dhe evropianë vetëm e vetëm për të ardhur në pushtet. Se a ka qenë pushteti aktual i koordinuar me propagandën e armiqve tanë të lartëpërmendur do ta dëshmojë historia, edhe pse në terren kanë funksionuar si një propagandë e vetme. Por, kur pushteti bazohet vetëm në propagandë e shumë pak ose fare në punë, bie edhe më palavdishëm sesa pushtetet që punojnë por që për arsye të ndryshme (ndoshta edhe vetëkënaqësie) s’arrijnë ta bëjnë propagandën e nevojshme për të mirën e vendit.

Kështu që gjatë kësaj periudhe 26 vjeçare (1999-2025) në Kosovë ka pasur dhe vazhdon të ketë betejë mes pushteteve që kanë bërë punë por jo propagandë dhe atyre që vazhdojnë të bëjnë propagandë por jo punë. Ndërkohë që shkelje e keqpërdorime ka pasur si në pushtetet e kaluara ashtu edhe në këtë të sotit. Dallimi i vetëm është që pushtetet e kaluara kanë bërë shumë punë të hajrit e bashkë me të edhe shkelje e keqpërdorime (hajni), ndërsa pushteti aktual vetëm shkelje e keqpërdorime (hajni) pa asnjë punë të hajrit.

Kjo betejë mes atyre të punës dhe të propagandës po vazhdon edhe sot dhe kjo për fat të keq e ka paralizuar tërë vendin, ku nga paperspektiva ekonomike po përjetojmë shpopullim të frikshëm që po vret të ardhmen e vendit.

FIFA Club World Cup ekskluzivisht vjen për herë të parë në Artmotion

Sponsoruar