Lluka: Qeveria e Kosovës s’do të shpenzojë asnjë cent nga buxheti i saj për “Kosovën e Re”
![](https://gazetainfokus.com/wp-content/uploads/2018/04/auto_kosova-e-re1524137572-780x439.jpg)
Autori: Gazeta inFokus
23:22 | 21 April 2018
Ministri i Zhvillimit Ekonomik, Valdrin Lluka ka thënë sonte se Qeveria e Kosovës nuk është ajo që do ta financoj termocentralin “Kosova e Re”.
Në një postim në Facebook, Lluka ka shkruar se duke marrë parasysh faktorët mjedisorë dhe faktorët e kostos, Qeveria u përcaktua se Termocentrali ‘Kosova e Re’ është zgjidhje e nevojshme për periudhën afatgjatë, duke mundësuar pavarësinë dhe sigurinë e furnizimit me energji elektrike dhe duke mundësuar kalimin më të sigurt energjetik nga energjia që varet nga linjiti drejt Burimeve të Ripërtëritshme të Energjisë.
Lluka ka theksuar se Termocentrali “Kosova e Re” do të dizajnohet dhe ndërtohet për një jetëgjatësi operacionale prej 40 vitesh, kështu që sipas tij, Qeveria do të jetë në gjendje të operojë me termocentralin për periudhën e mbetur prej 20 vitesh.
Lexoni postimin e plotë të Llukës:
Një ndër pikat kryesore të Strategjisë së Energjisë së Kosovës është zhvillimi i kapaciteteve të reja gjeneruese të energjisë elektrike. Kjo nënkupton që Qeveria e Kosovës po angazhohet për zhvillim të kapaciteteve të reja gjeneruese nga të gjitha burimet e mundshme që i posedon vendi ynë. Një ndër projektet më të mëdha të kësaj fushe është Projekti për Termocentralin “Kosova e Re”.
Në të njëjtën kohë, politikat ekonomike të Kosovës janë të orientuara për fuqizimin sa më të madh të sektorit privat, andaj edhe për pjesën më të madhe të kapaciteteve gjeneruese të energjisë elektrike, vendi ynë ka bërë përpjekje që investimet të vijnë nga sektori privat. Mirëpo, për t’i arritur të gjitha objektivat ekonomike të Qeverisë së Kosovës çështje kruciale është që fillimisht të arrihet pavarësia energjetike e vendit, si dhe siguria e furnizimit të rregull me energji elektrike.
Për të garantuar pavarësi energjetike dhe për të ofruar siguri në furnizimin me energji elektrike, Kosova duhet të zëvendësojë kapacitetet e TC “Kosova A” me kapacitete të reja gjeneruese. Në përgatitjen e projektit të Termocentralit Kosova e Re (TCKR), Qeveria i ka marrë parasysh me kujdes të gjithë faktorët determinues, duke përfshirë edhe faktorët mjedisorë edhe ata të kostos.
Në fakt, për të siguruar financim nga Institucionet Financiare Ndërkombëtare (IFI) për një termocentral me djegie të linjitit, janë marrë parasysh plotësisht të gjitha alternativat e realizueshme dhe kostot e tyre ekonomike. Studimet e shumta që janë bërë në vlerësimin e ndikimeve dhe kostos kanë ardhur në përfundim se Termocentrali “Kosova e Re”, në formën që po e zhvillojmë ne, është opsioni me koston më të ulët për të arritur këto qëllime.
Rrjedhimisht, duke marrë parasysh edhe faktorët mjedisorë dhe faktorët e kostos, Qeveria u përcaktua për Termocentralin “Kosova e Re” është zgjidhje e nevojshme për periudhën afatgjatë, duke mundësuar pavarësinë dhe sigurinë e furnizimit me energji elektrike dhe duke mundësuar kalimin më të sigurt energjetik nga energjia që varet nga linjiti drejt Burimeve të Ripërtëritshme të Energjisë.
Projekti i Termocentralit “Kosova e Re” është projekt i Partneritetit Publiko Privat (PPP). Në këtë rast, sikurse edhe në rastin e Aeroportit Ndërkombëtar të Prishtinës, sektori privat do të operojë impiantin për 20 vjet, e pastaj ia transferon atë sektorit publik pa asnjë kosto.
Termocentrali “Kosova e Re” do të dizajnohet dhe ndërtohet për një jetëgjatësi operacionale prej 40 vitesh, kështu që Qeveria do të jetë në gjendje të operojë me termocentralin për periudhën e mbetur prej 20 vitesh.
Projekti TC “Kosova e Re” do të realizohet komplet nga investimet private, pra Qeveria e Kosovës nga buxheti i saj nuk do të shpenzojë asnjë cent për këtë projekt. Investitori privat ContourGlobal, do të investojë tërë projektin, ku nga shuma e përgjithshme do të investojë 30% të kapitalit të saj, kurse pjesën tjetër investitori do ta sigurojë në formë kredie nga institucionet ndërkombëtare financiare, siç është Banka Botërore, partneri ynë kyç në këtë projekt, me institucionet e saj të brendshme si MIGA, IFC dhe IDA, pastaj Banka Evropiane për Rindërtim dhe Zhvillim, BERZH (Republika e Kosovës u bë shteti i 66-të anëtar i BERZH në dhjetor 2012.
Kështu që Projekti i Termocentralit “Kosova e Re” u kualifikua për mbështetje nga BERZH, përfshirë mbështetjen financiare.), Agjencitë e Kreditimit të Eksportit (ECA), Bankat Ex-Im, kreditorë komercialë dhe institucione potenciale kredituese të furnizuesit.
Në këtë pjesë duhet të sqarojmë se IRR (Norma e Brendshme e Kthimit) në kapital, është interesi që investitori kërkon ta kthejë për investimin që do të bëj në Kosovë. Shifra e kërkuar nga ContourGlobal ka qenë në mes të 23 deri 27%, kurse ne gjatë bisedimeve kemi arritur që këtë ta ulim deri në 18.5%. Mirëpo, duhet të sqarojmë se kjo normë e interesit është e aplikueshme vetëm për 30% të mjeteve të totalit të Projektit, (mjete këto që investitori do t’i investojë nga kapitali i vet), kurse pjesa tjetër do të jenë kredi nga institucionet financiare ndërkombëtare, për të cilat nuk aplikohet IRR. Pra interesi i këtyre kredive (70% e totalit të Projektit), do të jetë shumë më i ulët, sipas praktikave diku nën 7%.
Qeveria e Kosovës ka rol kyç për mbikëqyrjen e secilit proces të financimit dhe investimet që Investitori do t’i bëj në këtë Projekt. Po ashtu, Qeveria e Kosovës është shumë e angazhuar edhe në procesin tenderues që investitori do ta shpallë për përzgjedhjen e Kompanisë Ndërtuese (Inxhiniering, Projektim dhe Ndërtim). Me këtë ne do të sigurohemi se çdo proces dhe procedurë është bërë në përputhje të plotë me të gjitha aspektet ligjore dhe ekonomike vendore dhe ndërkombëtare.
![](https://gazetainfokus.com/wp-content/uploads/2024/01/EURO-2024-dhe-Serie-A-scaled-1.jpg)
Të tjera
-
Parashikimi i motit për të hënën
Për të hënën parashikohet të mbajë mot i vranët, ku pritet depërtimi i një ci...
-
Donald Trump emëron gjeneralin Keith Kellogg si të dërguarin e tij special për Ukrainën dhe Rusinë
Presidenti i zgjedhur Donald Trump ka zgjedhur Gjeneralin Keith Kellogg si të...
-
Kurti ua lypë mërgimtarëve 74 mijë vota: Paramendojeni çka bojmë me na i dyfishu ju votat
Kryeministri i Kosovës, Albin Kurti, ka kërkuar nga mërgimtarët më shumë vota...
-
Bedri Hamza takon profesorin e tij: Ato që i thotë, ka me i realizu, se ia njoh karakterin dhe mentalitetin
Kandidati për kryeministër nga radhët e PDK-së, Bedri Hamza, në rrjetet e tij...
-
Kush është fajtori kryesor për moskalimin e marrëveshjeve ndërkombëtare?
Ani pse pas një takimi të Albin Kurtit më kreun e PDK-së, u votuan disa marrë...
-
“Ka qenë i veçantë, një djalë i sjellshëm, i urtë, me të gjitha notat 5-she, ato që i premton edhe i realizon”, profesor Xhaferi vlerëson lart nxënësin e tij Bedri Hamzën
Kandidati i PDK-së për kryeministër, Bedri Hamza, ka takuar profesorin e tij,...
-
Bejta falënderon stafin e Komunës së Prishtinës për punën e palodhshme: Viti tjetër, edhe me më shumë suksese
Kandidatja për deputete nga LDK, Fiknete Bejta, ka publikuar disa fotografi n...
-
Pasaporta e Kosovës në mesin e 10 pasaportave të botës që kanë shënuar përmirësimin më të madh
Kryeministri i Kosovës, Albin Kurti, është shprehur se viti 2024 ka qenë viti...
-
Kërkohet ndihmë për 16-vjeçarin nga Istogu që vuan nga Leukemia, ka nevojë për shërim jashtë vendit!
Familja Dani nga Kërrnina e Istogut kërkon ndihmë për shërimin e djalit ! ...
-
Incidenti në Novi Sad, mijëra njerëz protestọjnë kundër regjimit të Vuçiqit
Studentët, të cilët prej javësh i kanë bllokuar fakultetet në Universitetin e...
-
Elezi: Mbi 58 mijë kërkesa për regjistrim të votuesve jashtë Kosovës
Zëdhënësi i Komisionit Qendror të Zgjedhjeve (KQZ), Valmir Elezi, ka njoftuar...
-
Java nis me reshje bore – Parashikimi i motit për pesë ditët e ardhshme
Moti nga e hëna parashihet të jetë i ftohtë dhe me reshje të herëpashershme b...