Lajme

Lista Serbe merr pjesë në zgjedhje: Incidenti me Konjufcën është arsye shtesë

Autori: Gazeta inFokus 16:10 | 06 December 2024

Partia e serbëve në Kosova, Lista Srpska, që ka mbështetjen e Beogradit, ka konfirmuar se do të marrë pjesë në zgjedhjet e 9 shkurtit. Deri më tani nuk është thënë zyrtarisht nga kjo parti se do të merrte pjesë.

Në një deklaratë të saj në Facebook, Lista Srpska thotë se këtë vendim u shty ta marrë pas “incidentit” që ndodhi dje në Kuvendin e Kosovës ku ata shkuan për t’u nënshkruar pas gjashtë muajve mungesë siç bëjnë tash e një kohë dhe u përballën me kundërshti nga deputetët e Vetëvendosjes.

Po ashtu, kryeparlamentari Glauk Konjufca ka ndërprerë seancën, duke thënë se veprimi i tyre përbën keqpërdorim të parasë publike dhe iu drejtua me fjalët “turp të keni”.

-Advertisement-

“Përfaqësuesit e Listës Serbe janë të vetmit që përfaqësojnë interesat e popullit serb në Kosovë dhe për këtë jemi gjemb në sy të regjimit të Albin Kurtit, por edhe përfaqësuesve ndërkombëtarë”, pretendoi Lista Srpska.

“Prandaj kjo është një arsye më shumë që Lista Serbe të marrë pjesë në zgjedhjet e 9 shkurtit dhe për këtë arsye shfrytëzojmë rastin për të informuar opinionin se Lista Serbe, asnjëherë më e fortë, do të marrë pjesë në zgjedhje, se ne do të fitojmë të dhjetë mandatet e dedikuara për popullin serb dhe se ne do të ruajmë unitetin dhe harmoninë e popullit serb në këto zona dhe se populli serb në zgjedhje do t’i tregojë të gjithëve se kë beson dhe kë do si përfaqësues të tij”.

Srpska sërish akuzoi kryeparlamentarin Konjufca për shkelje të ligjit dhe të të drejtave të njeriut, ndërsa për përfaqësuesit ndërkombëtarë tha se “ende heshtin”.

“Ata heshtin kur kryetari i Kuvendit i përjashton nga parlamenti përfaqësuesit e popullit serb të zgjedhur në mënyrë demokratike, duke treguar kështu hipokrizinë dhe mospërputhjen më të lartë”./Express/

Subscribe në YouTube: GAZETA INFOKUSI