Lajme

Lirohen nga akuzat Albulena Haxhiu, Pal Lekaj dhe të tjerët të akuzuar për gazin lotsjellës në Kuvend

Autori: Gazeta inFokus 16:01 | 18 May 2021

Gjykata Themelore në Prishtinë, i ka liruar nga akuzat për armëmbajtje pa leje, ministren e Drejtësisë, Albulena Haxhiu, deputetin Pal Lekaj dhe ish-deputetet Donika Kadaj-Bujupi dhe Besa Baftiu që akuzoheshin për rastin e hedhjes së gazit lotsjellës në Kuvendin e Kosovës.

Shpallja e aktgjykimit u bë nga gjykatësja Fatime Dermaku, e cila tha se në mungesë të provave, të akuzuarit lirohen nga akuzat, raporton “Betimi për Drejtësi”.

Fillimisht, gjykatëse e këtij rasti ka qenë gjykatësja Naime Krasniqi – Jashanica, por pas kalimit të saj nga Departamenti i Krimeve të Rënda në Departament të Përgjithshëm, ky rast do të gjykohet nga gjykatësja Fatime Dermaku.

Ndryshe, për këtë rast gjashtë seanca ishin shtyrë, si ajo e 10 dhe 30 korrik, 2 dhe 15 shtator 2020, si dhe 16 mars e 1 prill 2021.

Sipas aktakuzës së ngritur me 8 prill 2016, Lekaj, Baftiu, Kadaj-Bujupi dhe Haxhiu akuzohen se pa autorizim kishin poseduar bombola të gazit lotsjellës.

Në aktakuzë thuhet se më 19 shkurt 2016, rreth orës 12:20, në hollin e Kuvendit e Kosovës, pas pauzës së punimeve të Kuvendit, derisa të akuzuarit ishin duke u kthyer në sallë, gjatë kontrollit nga ana e punëtorëve të sigurimit të Kuvendit, tek të akuzuarit ishin gjetur dhe sekuestruar nga një bombole e gazit lotsjellës, të cilën e mbanin pa autorizim.

Për këto veprime, katër të akuzuarit po dyshohet se secili veç e veç kanë kryer veprën penale “mbajtja në pronësi, kontroll ose posedim të paautorizuar të armëve” nga neni 374, paragrafi 1, të KPRK-së.

Të tjera