Lajme

Lëkundet koalicioni në kryeqytet, PDK dhe LVV bëhen bashkë për anulimin e vendimit për pronat në Badovc

Autori: Gazeta inFokus 15:57 | 04 February 2024

Leutrim Retkoceri, shef i asamblistëve të PDK-së në Komunën e Prishtinës ka shkruar në Facebook se kjo parti që bashkëqeveris në kryeqytet me LDK-në ka nisur mbledhjen e nënshkrimeve për thirrjen e seancës së jashtëzakonshme për “shfuqizimin e vendimit të dëmshëm në Badovc”.

Paraprakish LVV ka njoftuar për thirrjen e seancës së jashtëzakonshme, ndërsa Retkoceri thotë se s’ka rëndësi kush thërret mbledhje. Ai tha se mbështesin çdo thirrje për anulimin e vendimit.

“Kemi më shumë se tre orë prej që kemi filluar procesin e mbledhjes së nënshkrimeve për thirrjen e seancës së jashtëzakonshme për shfuqizimin e vendimit të dëmshëm për Badovc, me arsyetimin e bashkëngjitur”, shkroi Retkoceri.

-Advertisement-

“LVV kishte thënë publikisht se e mbështetë nëse marrim konfirmimet e nevojshme ligjore dhe i’u qasëm në bazë të fjalëve të tyre publike për të vepruar për të mirën e përbashkët. Derisa po merrnim nënshkrimet e nevojshme në terren, pamë që LVV doli me njoftim publik për iniciativën e njejtë. Shumë mirë. Për ne nuk ka pasë asnjëherë randësi kush thërret mbledhje. Këtë e kemi dëshmuar edhe me rastin e mbledhjes për faljen e tatimit në pronë. Nuk kemi nevojë as tash për protagonizmin e njejtë. Ne mbështesim cilëndo thirrje për anulimin e vendimit”, shtoi ai.

Koalicioni PDK-LDK në kryeqytet është lëkundur pas shkarkimit të drejtorit të shërbimeve publike, Ilirik Musliu nga ana e kryetarit Përparim Rama të premtën.

Nënkryetarja e Komunës së Prishtinës, Donjeta Sahatçiu ka deklaruar është revansh i kryetarit të Komunës qëndrimin e PDK-së lidhur me këmbimin e pronave në Badovc.

Subscribe në YouTube: GAZETA INFOKUSI