Lajme

Lajçak: Pas zgjedhjeve në Kosovë, duhet të ketë ndryshim të rëndësishëm në zbatim të Marrëveshjes së Ohrit

Autori: Gazeta inFokus 09:36 | 01 Shtator 2024

Ndërmjetësi evropian në dialog, Miroslav Lajçak në Forumin e Sigurisë GLOBSEC në Pragë ku po merr pjesë ka thënë se s’pritet të ketë zbatim të marrëveshjes mes Kosovës e Serbisë para zgjedhejve në Kosovë.

Emisari sllovak tha se “është naive të presin një kthesë para zgjedhjeve, por theksoi se duhet të ketë ndryshim të rëndësishëm dhe zbatim menjëherë pas zgjedhjeve.

“Nëse nuk e zgjidhim çështjen e dialogut ndërmjet Beogradit dhe Prishtinës, mund të harrojmë integrimin e Ballkanit Perëndimor në BE, jo vetëm Serbisë dhe Kosovës. Mendoj se arritëm të bëjmë më të mirën e mundshme me marrëveshjen për normalizim që u miratua vitin e kaluar në Ohër, por ajo nuk u zbatua kurrë”, tha Lajçak.

-Advertisement-

“Megjithatë, mungon vullneti politik dhe shoqëria nuk është e gatshme për këtë. Përveç kësaj, në shkurt do të kemi zgjedhje parlamentare në Kosovë, prandaj është naive të presim një kthesë para zgjedhjeve. Por duhet të ketë ndryshim të rëndësishëm në zbatim menjëherë pas zgjedhjeve”, tha Lajçak.

Zyrtari evropian citoi mesazhin e presidentit francez Emmanuel Macron gjatë vizitës së tij në Beograd: “Rruga është e asfaltuar dhe quhet Ohër”.

Nën Lajçakun si emisar, në vitin 2023, është arritur edhe Marrëveshja drejt normalizimit të marrëdhënieve, e cila u bë e njohur si Marrëveshja e Ohrit, por që ka mbetur kryesisht e pazbatuar.