Më 3 prill, Albin Kurti i çoi letër të dërguarit të posaçëmtë BE-së për dialogun Kosovë – Serbi, Miroslav Lajçak.

Këti i uroi detyrën, duke i shprehur gatishmërinë për dialogun dhe arritjen e një marrëveshje përfundimtare, shkruan gazeta inFokus.

Ndërsa në letrën që i ka kthyer Lajçak, i jep fjalën që do të rikthej angazhimin e BE-së në dialog dhe në zgjidhjen e problemeve Kosovë – Serbi.

“Emërimi im jep sinjale të një rikthimi të angazhimit të BE-së në dialog. Synimi im është të punoj pareshtur dhe në mënyrë dinamike për të ecur para në procesin e dialogut, dhe pres që edhe Prishtina dhe Beogradi t’i rikthehen angazhimit të tyre me të njëjtën vendosmëri. Siç e keni theksuar edhe ju, kjo gjë është e rëndësishme për të mirën e të dy popujve. Jam i bindur që nëse ka vullnet të sinqertë politik nga të dy palët, dhe me anë të dialogut, do jemi në gjendje t’i arrijmë rezultatet të cilat secili nga ne i synon, për të mirën e popullit në Kosovë dhe Serbi”, ka shkruar Lajçak.

Ndërsa, e ka përgëzuar Kurtin për luftën kundër koronavirusit dhe heqjen e taksës 100%, shkruan gazeta inFokus.

“Unë, vendimin tuaj për heqjen e tarifës, e shoh si shenjën e parë konkrete të vullnetit tuaj për të rinisur Dialogun e Lehtësuar nga BE.

Këto ditë janë të vështira për të gjithë ne në Evropë, pasi që po përballemi me sfida të pa-përjetuara më herët, në shëndetin tonë publik, shoqëri dhe ekonomi. Dëshiroj t’ju përgëzoj juve, dhe administratën tuaj, për përpjekjet tuaja në luftën kundër pandemisë së koronavirusit deri më tani. Gjithashtu dëshiroj t’ju siguroj se BE-ja qëndron përkrah Kosovës dhe njerëzve të saj në luftën kundër kësaj pandemie. Ndihma jonë e menjëhershme financiare prej 5 milion Euro për t’i përmbushur nevojat më urgjente në luftimin e koronavirusit, është vetëm fillimi i mbështetjes sonë për Kosovën. Në këtë aspekt, e shpreh me kënaqësi që marrëveshjet e kaluara të dialogut, kanë rezultuar të dobishme për t’ju ndihmuar në trajtimin e krizës së koronavirusit.

Bashkëpunimi rajonal në këto periudha sfiduese, veçanërisht kur bëhet fjalë për lëvizjen e papenguar të mallrave, është thelbësor për të mbajtur në kontroll pandeminë. Gjithashtu në këtë kontekst, unë do të doja të përsëris mirëpritjen e BE-së për vendimin për heqjen e tarifave për importet nga Serbia dhe Bosnja dhe Hercegovina.

Kam kënaqësinë të vërej besimin tuaj të vendosur në idealet e Bashkimit Evropian, rëndësinë e tyre dhe përkatësinë e tyre për Kosovën. Më lejoni t’ju siguroj se për Bashkimin Evropian dhe vendet e saj anëtare është me rëndësi shumë të lartë të ndihmojmë fqinjët tanë të Ballkanit Perëndimor në rrugën e tyre evropiane. Kosova ndan perspektivën evropiane të Ballkanit Perëndimor dhe unë besoj se me punën tonë në dialog dhe progresin në normalizimin gjithëpërfshirës të marrëdhënieve, ne do të mundësojmë progres të mëtutjeshëm në rrugën tuaj evropiane.

Duke pasur parasysh rrethanat e virusit COVID-19, do të më duhet të rregulloj planet e mia për fillimin e punës sime; Do të më pëlqente të të takoja personalisht në ditët në vijim dhe të shkëmbejmë mendime për rrugën përpara. Kjo nuk do të jetë e mundur në të ardhmen e afërt; megjithatë, kjo situatë nuk do të më ndalojë të angazhohem.

Unë do ju kontaktoj ju dhe udhëheqjen politike në Kosovë, në mënyrë që të fillojmë atë që shpresoj se do të jetë një shkëmbim dhe bashkëpunim i mirë dhe i frytshëm midis nesh. Në ndërkohë do t’ju inkurajoja të përdorni këtë periudhë të kufizimeve të koronavirusit në mënyrë që të vazhdoni të reflektoni dhe përgatiteni për rifillimin e procesit”./Gazeta inFokus/