Lajme

Ky është reagimi i Rusisë pasi Kosova i shpalli “non-grata” dy zyrtarë rusë

Autori: Gazeta inFokus 11:39 | 24 October 2021

Rusia ka reaguar nëpërmjet Ministrisë së saj të Jashtme për vendimin e Kosovës që të shpallën non-grata dy zyrtarë të saj.

Zëdhënësja e Ministrisë së Jashtme të Rusisë Maria Zaharova, tha të shtunën se ky vendim nuk do të ketë pasoja për statusin juridik të tyre.

“Ne supozojmë ky hap i administratës së Prishtinës nuk do të ketë asnjë pasojë për statusin juridik të diplomatëve të përmendur rusë”.

-Advertisement-

Ajo e quajti “provokim të qëllimshëm” këtë vendim, dhe në favor të, siç shtoi, projektit perëndimor të Qeverisë së Kosovës, e cila sipas saj po ndjek një politikë agresive të drejtuar kundër Rusisë dhe rolit të saj konstruktiv në Ballkan.

“I bëjmë thirrje UNMIK-ut dhe forcave ndërkombëtare në Kosovë, në kuadër të kompetencave të tyre në përputhje me Rezolutën 1244 të Këshillit të Sigurimit të OKB-së, të garantojnë sigurinë dhe kushtet e nevojshme për punën normale të personelit të zyrës ruse në Prishtinë. Ne presim garanci të duhura me shkrim nga administrata e OKB-së”.

Zaharova tha se zyrtarët e dëbuar janë akredituar nga UNMIK-u.

Rusia i bëri thirrje misionit të OKB-së në Kosovë, UNMIK dhe forcave paqeruajtëse ndërkombëtare të udhëhequra nga NATO, që të reagojnë.

Të premtën, presidentja e Kosovës Vjosa Osmani, ka njoftuar se gjatë kësaj jave kishte kërkuar nga Ministria e Punëve të Jashtme që t’i shpallte “non grata” dy zyrtarë të Rusisë që kanë punuar në Zyrën Ndërlidhëse të Federatës Ruse në Kosovë.

Osmani tha se aktiviteti i tyre e ka cenuar sigurinë kombëtare dhe rendin kushtetues të Republikës së Kosovës.

“Këtë javë kam kërkuar nga zëvendëskryeministrja, njëherësh ministre e Punëve të Jashtme dhe e Diasporës, Donika Gërvalla-Schëarz, t‘i shpallë persona non grata dy zyrtarë të Zyrës Ndërlidhëse të Federatës Ruse në Kosovë, për shkak të aktivitetit të tyre të dëmshëm, i cili ka cenuar sigurinë kombëtare dhe rendin kushtetues të Republikës së Kosovës. Sot, MPJD-ja ka nxjerrë vendimin për shpalljen e këtyre dy zyrtarëve rus persona të padëshirueshëm dhe në të njëjtën kohën i ka njoftuar institucionet ligjzbatuese dhe autoritetet përkatëse për zbatimin e tij”.

Subscribe në YouTube: GAZETA INFOKUSI

Të tjera

Fokusi

lajme