Lajme

Ky është numri i shtatzënave të vaksinuara deri më sot, MSh-ja me thirrje për gratë

Autori: H. Smajli 15:06 | 08 September 2021

Mbi 3 mijë është numri i shtatzënave dhe nënave gjidhënëse që janë vaksinuar kundër COVID-19 në Kosovë.

E 960 prej tyre janë vaksinuar në muajin gusht, në kohën kur edhe filluan të rriten rastet e shtatzënave të infektuara me këtë virus.

Kështu kanë bërë të ditur për Gazetën Infokus nga Ministria e Shëndetësisë, e që në bazë të këtyre të dhënave nga fillimi i pandemisë vetëm 4 mijë doza janë administruar për gratë shtatzëna.

-Advertisement-

“Për informacion, deri tash janë administruar rreth 4000 doza tek gratë shtatzëna dhe nënat gjidhënëse, apo për rreth 3300 persona të kësaj kategorie. Vetëm javën e fundit, (30 gusht -4 shtator) janë administruar 1153 doza për 960 shtatzëna dhe nëna gjidhënëse”, thuhet në përgjigjen e MSH-së.

Ndërsa nga ky institucion kanë bërë thirrje që gratë shtatzëna të vaksinohen pasi nuk ka ende asnjë dëshmi se ky proces sjell ndonjë dëm te nëna apo të foshnja.

“Vaksinimi nuk është akt i detyrueshëm, por është i rëndësishëm për t’u mbrojtur nga virusi. MSh u ka bëre thirrje shtatzënave dhe nënave gjidhënëse që të vaksinohen, sepse ka dëshmi të mjaftueshme shkencore, të ofruara si nga CDC, OBSH, Shoqatat Ndërkombëtare të Gjinekologëve dhe Obstetërve që vaksinimi jep përfitime të mëdha për shtatzënat, derisa nuk ka asnjë dëshmi që është i dëmshëm për shtatzëninë apo fertilitetin”, thuhet në përgjigjen e tyre.

Gazeta Infokus ka raportuar po ashtu edhe për problemet që po kanë shtatzënat për tu vaksinuar në qendrat e vaksinimit në vend ku po u kërkohet udhëzim nga gjinekologu, derisa MSh-ja ka sqaruar se një dokument i tillë nuk është fare i nevojshëm për vaksinim anticovid.

Kujtojmë se ditëve të fundit në vend është rritur numri i shtatzënave të infektuara me COVID-19 e vetëm në muajin gusht në Klinikën e Gjinekologjisë në QKUK janë trajtuar 90 shtatzëna e ka pasur edhe disa raste që përfunduan me fatalitet./Gazeta Infokus/

LEXO EDHE: Udhëzim nga gjinekologu për t’u vaksinuar, MSh-ja sqaron nëse u duhet shtatzënave ky dokument

Subscribe në YouTube: GAZETA INFOKUSI