Lajme

Kurti takohet me deputeten ukrainase: Putin e ka llogaritur gabim trimërinë e ukrainasve

Autori: Gazeta inFokus 13:15 | 05 June 2022

Kryeministri i Kosovës, Albin Kurti, ka marrë pjesë në forumin “GLOBSEC 2022” në Bratisllavë të Sllovakisë, ku është takuar me deputeten ukrainase Solomiia Bobrovska.

Në këtë forum, Ukraina fitoi çmimin “GLOBSEC 2022”, e që në emër të shtetit ukrainas atë e mori pikërisht deputetja Bobrovska.

I pari i qeverisë tha se me Bobrovskan patën shansin të bisedojnë, për të cilën shtoi se ajo tha se do të ishte më mirë nëse do të ishte në vijën e parë të frontit, duke ndihmuar ukrainasit ta çlirojnë vendin e tyre nga fashizmi rus.

“Putini e ka llogaritur gabim trimërinë e ukrainasve, rezistencën e tyre të ashpër dhe sakrificën për vendin e tyre, i cili ka mbledhur demokracitë botërore që jo vetëm të empatizojnë luftën e tyre, por edhe t’i bashkohen në mbrojtjen e vendit të tyre dhe vlerave tona të përbashkëta të lirisë dhe demokracisë”, ka shkruar Kurti.

Pjesëmarrës në këtë forum qe edhe presidenti serb, Aleksandar Vuçiq si dhe udhëheqës të vendeve të tjera të Ballkanit Perëndimor.

Temë e diskutimit kur kryeministri i Kosovës ishte pjesëmarrës ishte “Tani ose kurrë: Zhbllokimi I të ardhmes evropiane për Ballkanin Perëndimor”.

Etiketa:

Të tjera

Fokusi

lajme