Lajme

Kurti nuk ulet njëherë në tavolinë me Vuqiçin

Autori: Besarta Qadraku 18:14 | 23 February 2021

Albin Kurti, lider i Lëvizjes Vetëvendosje, nuk do të ulet në tryezë me presidentin e Serbisë, Aleksandër Vuçiç për të biseduar për Kosovë, pa i zgjidhur problemet e brendshme të shtetit.

Fituesi i zgjedhjeve të 14 shkurtit, ka deklaruar se në udhëheqjen e tij do të fokusohet në rikuperimin e dëmeve që ka shkaktuar pandemia, të “rehatoj” problemin me papunësinë, të bëjë ç’kapjen e shtetit nga korrupsioni për t’ia lënë radhën më pas dialogut me Serbinë.

Por zotimeve të kreut të Vetëvendosjes për t’u përqendruar tek sfidat e brendshme të shtetit, u ka dalë kundër Bashkimi Evropian dhe Shtetet e Bashkuara të Amerikës.

Zëdhënësi i Departamentit Amerikan të Shtetit, Ned Price pas zgjedhjeve në Kosovë, i ka kujtuar Kurtit se duhet dhënë prioritet dialogut.

“Shtetet e Bashkuara mbështesin fuqishëm dialogun e ndërmjetësuar nga BE me Kosovës dhe Serbisë, që synon një marrëveshje gjithëpërfshirëse, që duhet të fokusohet tek njohja reciproke. Qeverinë e re e inkurajojmë që sapo të formohet, t’i japë prioritet bisedimeve”, ka thënë ai.

Thirrja nga Departamenti i Shtetit erdhi pas takimit që ambasadori amerikan në Prishtinë, Filip Kosnet zhvilloi disa ditë pas zgjedhjeve në zyrat e Vetëvendosjes me Albin Kurtin.

Por, pavarësisht thirrjeve të ndërkombëtarëve, njohësit e çështjeve politike, po i mbështesin qëndrimet e Albin Kurtit.

Analisti politik, Ramush Tahiri, ka thënë për Gazetën inFokus, se dialogun nuk e ka prioritet as shteti fqinj, prandaj në këtë situatë nuk duhet të ketë as Kosova.

“Secili shtet i ka prioritetet e veta, në këtë rast Albin Kurti ende nuk është kryeministër por po i tregon prioritetet e qeverisë. Në këtë situatë, prioritet kryesor është normale të jetë koronavirusi, sepse është problem i gjithë qytetarëve. Ne e kemi edhe pamundësinë e zhvillimit ekonomik dhe korrupsionin”, thotë Tahiri.

Sipas tij dialogu nuk është prioritet, pasi po vazhdon me vite dhe do të vazhdojë.

“Mendoj që Albinin nuk duhet me shty për  me vazhdu dialogun dhe me i ndrru prioritetet e qeverisë. Ai e ka mandatin është zgjedhur nga populli dhe i cakton prioritetet e veta. Në kuadër të asaj që ka  thënë është i katërt prioritet por është i barabartë sepse është ekipi i cili punon për këtë çështje dhe është i barabartë. Sepse edhe Serbia nuk e ka të parën këtë çështje”, është shprehur ai.

Tahiri vlerëson se fati i shtetit nuk është i varur nga dialogu me Serbinë.

“Unë e shoh mirë dhe nuk e shoh me dyshim këtë ide e tij që thotë se është e katërta por nuk do të thotë se është më e rëndësishme. Figurativisht thuhet se nuk është prioritet dhe nuk është e preokupuar se fati i Kosovës nuk është i varur dhe nuk do duhej të ishe i varuar nga dialogu”, është shprehur Tahiri.

I të njëjtit mendim, është edhe analisti politik, Imer Mushkolaj.

Mushkolaj për Gazetën inFokus, ka thënë se lideri i VV’së po ofron një çasje të re, sepse çasja tjetër nuk ka treguar rezultat për vite të tëra.

“Po besoj se kështu ka vepruar për shkak të mungesës së rezultateve që i ka tregu dialogu tash e 10 vite. Mos të harrojmë se të gjithë paraardhësit e tij d.m.th. kryeministrat e mëhershëm po flas për 20 vitet e fundit e kanë pasur prioritet  dialogun dhe kanë tregu vullnet karshi Serbisë për të vazhduar dialogun. Por kjo nuk është vlerësuar dhe rezultati është  ky që është”, thotë Mushkolaj.

Ai konsideron se dialogu i deritashëm ka qenë një proces i dështuar pasi nuk është arritur njohja e Kosovës nga Serbia.

“Dhe me këtë logjikë po besoj se z. Kurti e ka vendosur dialogun jo ndër prioritetet kryesore. Sepse ai i ka marrë votat më 14 shkurt duke mos e pasur prioritet kryesor dialogun”, thotë ai.

Sipas Mushkolajt Kurti ka vepruar në përputhje me atë se çfarë kanë kërkuar qytetarët përmes sondazheve dhe kjo mosdhënie e prioritetit është mesazh për BE’në.

“Kështu edhe shumë sondazhe janë duke treguar se dialogu nuk është preokupim i qytetarëve të Kosovës. Por jemi mësuar me këtë presionin që e bën BE dhe SHBA për të vazhuar dialogu. Dialogu duke të vazhdojë por qasja duhet të ndryshojë, por duke e pasur parasysh që Kurti po e përmend dialogun në këtë kontekst ku dialogu nuk është prioritet kryesor e kam përshtypje se po don me jep mesazh BE dhe SHBA që të ndërrojnë qasje në kuptimin që dialogu të prodhojë rezultat. E jo që Kosova të tregojë vullnetin e mirë por Serbia të mos lëviz nga vendi”, ka deklaruar ai.

Ndryshe, Gazeta Infokus ka kontaktuar edhe Lëvizjen Vetëvendosje, por nuk kanë dashur të japin detaje se kur do të caktohet koha e saktë për fillimin e dialogut Kosovë-Serbi.
Kujtojmë se dialogu politik mes Kosovës dhe Serbisë, me ndërmjetësimin e Bashkimit Evropian, ka nisur më 2011./Gazeta Infokus/

Të tjera