Lajme

Kurti: Ndërhyrja e NATO-s për ndaljen e gjenocidit dhe emri i Albright, i përkasin të njëjtës fjali

Autori: Gazeta inFokus 22:48 | 27 April 2022

Kryeministri Albin Kurti, bashkë me presidenten Vjosa Osmani, sot kanë marrë pjesë në ceremoninë e varrimit të ish-sekretares së SHBA-së, Madeleine Albright në Uashington. Në një njoftim të fundit, Kurti tha se sot iu dha lamtumira në gruaje që ka kontrbuar “më shumë se gati çdokush tjetër për popullin tonë, në momentet e tij më të vështira”. Kurti ka përmendur edhe ish-presidenten Atifete Jahjaga, që ja marrë pjesë në këtë ceremoni.

Për Kurtin, emri i Albright lidhet ngushtësisht me ndaljen e gjenocidit të Serbisë në Kosovë përmes ndërhyrjes së NATO-s.

“Nga ambasadore e ShBA-ve në OKB te Sekretare Amerikane e Shtetit, nga administrata e Presidentit Jimmy Carter tek ajo e Presidentit Bill Clinton, nga përvoja në fëmijëri si refugjate e persekutimit nazist te vepra e saj e fundit mbase më i rëndësishmi libër anti-fashist në shekullin XXI, Zonja Sekretare Madeleine Albright ka lënë trashëgimi tejet të pasur për politikën, diplomacinë dhe historianët. Kurse për Kosovën dhe shqiptarët ndërhyrja e NATO-s për të ndalur gjenocidin e Serbisë dhe emri i saj i përveçëm Madeleine Albright i përkasin të njëjtës fjali”, ka shkruar ai.

Kurti, po ashtu, ka njoftuar edhe për takimet që ka zhvilluar me personalitete të rëndësishme të politikës amerikane, gjatë ceremonisë.

“Në kuadër të ceremonisë, patëm rast të takoheshim me mysafirë të tjerë dhe miq të çmuar të Kosovës, duke përfshirë sekretarin aktual të Shtetit, z. Antony Blinken, ish presidentin e ShBA-së, z. Bill Clinton, ish zëvëndëspresidentin, z. Albert Gore, ish sekretarët e Shtetit znj. Hillary Rodham Clinton, znj. Condoleezza Rice dhe z. John Kerry, si dhe ish kongresistin z. Eliot Engel. Përveç Presidentit Joseph Biden, ish Presidentit Bill Clinton dhe ish Sekretares së Shtetit Hilary Clinton, fjalim prekës mbajtën edhe tri vajzat e saj: Alice, Anne dhe Katharine”, ka shkruar në fund Kryeministri Kurti.