Lajme

Kurti: Me luf*ëtarë si Ilir Konushevci e paimagjinueshmja bëhej e mundur

Autori: Gazeta inFokus 12:11 | 09 May 2025

Kryeministri në detyrë i Kosovës, Albin Kurti, së bashku me kabinetin qeveritar dhe familjarë të dëshmorëve, bëri homazhe në 27-vjetorin e rënies së Ilir Konushevcit dhe Hazir Malajt.

Kurti theksoi rolin kyç të Ilir Konushevcit në logjistikën e UÇK-së dhe kontributin e tij të pazëvendësueshëm në furnizimin me armatim në kohë të vështira.

Ai vuri në dukje se veprimtaria e Ilirit nisi më 13 maj 1992 dhe vazhdoi pandërprerë deri në rënien e tij heroike, duke shtuar se pa njerëz si ai, lufta çlirimtare nuk do të ishte e mundur.

-Advertisement-

“Jemi këtu tek varret e dëshmorëve tanë që para 27 vjetësh ranë heroikisht, duke sjellë armatim për UÇK-në. Ilir Konushevci-Mërgimi ishte pasardhës i denjë i Zahir Pajazitit dhe ishte shpirti i UÇK-së, meqenëse ishte në krye të logjistikës dhe furnizimit në një kohë të vështirë, ku UÇK-ja po përballej me një ushtri që ishte shumëfish më e pajisur me armatim dhe municion, por me vullnetin e çeliktë të luftëtarëve si puna e Ilir Konushevcit dhe ajo që ishte e paimagjinueshme bëhej e mundur. UÇK-ja jo vetëm që merrte pjesë në beteja, por ngadhënjente aty. Ilir Konushevci e ka nisur veprimtarinë e tij saktësisht më 13 maj 1992, atëherë kur u formua organizata e fshehtë politike “Shqiponja” dhe prej asaj dite nuk u nda asnjëherë në organizimin e shtimit të radhëve te ushtarëve të UÇK-së. Kur i kujtojmë dëshmorët e kombit, heronjtë e parë që kanë punuar në vitet ‘90 duhet ta kujtojmë që kishim luftëtarë edhe para luftës çlirimtare. Pa njerëz si Iliri nuk mund ta kishim luftën çlirimtare. Andaj homazhet tona tek dëshmorët shprehim mirënjohjen e thellë”, tha Kurti.

Subscribe në YouTube: GAZETA INFOKUSI