Lajme

Kurti e falënderon ambasadoren Ziv për vendimin e Izraelit për vizat

Autori: Gazeta inFokus 19:07 | 01 February 2024

Kryeministri i Kosovës, Albin Kurti, e ka falënderuar ambasadoren izraelite në Prishtinë, Tamara Ziv, për vendimin e Izraelit për t’i hequr vizat për shtetasit e Kosovës.

Në fund të muajit të kaluar, presidentja e Kosovës, Vjosa Osmani, njoftoi se Izraeli e ka pranuar kërkesën e Kosovës për t’i lejuar kosovarët të udhëtojnë lirshëm drejt vendit të Lindjes së Mesme për qëllime turistike.

Ky vendim i Izraelit – i cili është vendi i fundit që e njohu pavarësinë e Kosovës para rreth tri vjetëve, do të hyjë në fuqi pas nënshkrimit të marrëveshjes.

-Advertisement-

“Kryeministri Kurti falënderoi ambasadoren Ziv për komunikimin e afërt dhe mbështetjen e vazhdueshme”, thuhet në njoftim.

Në takim, sipas njoftimit të Qeverisë, u diskutuan edhe për thellimin e bashkëpunimit ekonomik mes dy vendeve.

“U diskutua edhe rreth mundësisë për organizimin e një Forumi Ekonomik që do të shërbente si mundësi për të promovuar bashkëpunimin ekonomik dhe mundësitë për të investuar në Kosovë”, thuhet në njoftim.

Ndërkohë, Kurti ka thënë gjithashtu gjatë takimit se Qeveria e tij e mbështet të drejtën e Izraelit për t’u vetëmbrojtur dhe tha se shpreson se do të arrihet një armëpushim i qëndrueshëm dhe i përhershëm mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian.

Ai i shprehu ngushëllime ambasadores izraelite në Kosovë për viktimat e sulmeve të Hamasit në jug të Izraelit më 7 tetor.

Pjesëtarët e Hamasit i vranë afër 1.200 izraelitë, shumica civilë, dhe I rrëmbyen afër 250 të tjerë më 7 tetor. Pothuajse gjysma e pengjeve u liruan gjatë armëpushimit njëjavor të nëntorit.

Ofensiva izraelite në Rripin e Gazës më pas, I ka vrarë mbi 26.700 palestinezë, sipas Ministrisë së Shëndetësisë në Gazën e udhëhequr nga Hamasi, institucion që nuk bën dallim mes civilëve dhe luftëtarëve.

Kohëve të fundit ndërmjetësuesit nga SHBA dhe Lindja e Mesme ishin optimist për arritjen e një marrëveshjeje armëpushimi, por të martën kryeministri izraelit, Benjamin Netanyahu, i refuzoi dy kërkesat kryesore të grupit radikal palestinez – që Izraeli të tërheqë forcat e tij nga Gaza dhe të lirojë mijëra të burgosur palestinezë – duke vënë në pah se mes dy palëve ka ende dallime të mëdha. /REL

Subscribe në YouTube: GAZETA INFOKUSI