Shkruan: Ali Caka

NATO dhe Kosova – Aleancë e domosdoshme për paqen dhe sigurinë në Evropën Juglindore e më gjerë
11 mars 2025

Vizita e Sekretarit të Përgjithshëm të NATO-s, Mark Rutte, në Kosovë është më shumë se një ngjarje diplomatike, është konfirmim i rrugës së Kosovës drejt së ardhmes të sigurt dhe të qëndrueshme në sistemin euro-atlantik të sigurisë.

Vizita e sotme nuk është vetëm një dëshmi e përkushtimit të NATO-s për stabilitetin në rajon, por është edhe një sinjal i fortë se koha e pritjes ka kaluar dhe se partneriteti i Kosovës me aleancën më të fuqishme ushtarake në botë duhet të përparojë me hapa konkretë.

Që nga viti 1999 NATO ka qenë e pranishme në Kosovë, duke mbrojtur paqen dhe duke mbështetur ndërtimin e institucioneve të sigurisë që sot janë më të afta dhe më të përkushtuara se kurrë për të qenë pjesë e arkitekturës mbrojtëse të aleancës.

Kosova nuk është më thjesht vend që përfiton nga siguria e garantuar nga të tjerët, po është tashmë një kontribuuese aktive në stabilitetin rajonal dhe ndërkombëtar, është një partnere që ndan dhe që mbron vlerat demokratike euro-atlantike.

Por, realiteti mbetet i padrejtë, se Kosova ende nuk është anëtare e NATO-s, jo për shkak të mungesës së meritës a të përkushtimit të saj, por për shkak të bllokadave të ngritura nga disa shtete që refuzojnë ta njohin atë si një shtet sovran. E megjithatë, historia na mëson se NATO ka pranuar anëtarë edhe pa njohje të plotë ndërkombëtare, duke vënë në plan të parë pragmatizmin dhe interesin strategjik mbi burokracitë politike. Dhe një pragmatizëm i tillë duhet të vlejë edhe për Kosovën.

Në një kohë kur sfidat globale të sigurisë po bëhen më të ndërlikuara dhe kur kërcënimet hibride po sfidojnë themelet e mbrojtjes kolektive, NATO e kupton më mirë se kurrë se Kosova nuk mund të mbetet në një status të paqartë gjeopolitik. Stabiliteti i Ballkanit nuk mund të ruhet duke mbajtur Kosovën jashtë mekanizmave të sigurisë, se një Kosovë e fortë, e sigurt dhe e integruar nuk është vetëm në interesin e saj, por është edhe në interesin e aleancës.

Vizita e sotme e Rutte-s e dëshmon këtë qasje të re. Vizita tregon se NATO nuk e sheh më Kosovën si një çështje të pazgjidhur, por e sheh si një faktor stabiliteti, e sheh si një partner të besueshëm që nuk mund të lihet më në pritje. Diplomacia e Kosovës nuk është më një diplomaci e heshtur, që pret me duart e kryqëzuara, por është një diplomaci aktive, që vepron, që punon për të ndërtuar mbështetje dhe për të çuar përpara procesin e integrimit të saj në aleancë.

Ne si qytetarë kemi për detyrë ta përforcojmë këtë besim dhe ta mbështesim këtë përpjekje. Kosova nuk është më një përfituese pasive e mbrojtjes së siguruar nga të tjerët, por është gati të marrë përgjegjësitë e saj si anëtare e NATO-s. Dhe aleanca është e interesuar ta ketë Kosovën brenda.

E NATO nuk mund të ketë një Evropë të qëndrueshme dhe të sigurt pa Kosovën brenda saj e Kosova nuk mund të presë pafundësisht se koha për hapa konkretë ka ardhur, dhe se koha për një partneritet të plotë është tani.

Shkëlqim Devolli dhe Adriatik Kelmendi e presin ambasadorin amerikan, Jeff Hovenier

Sponsoruar