Lajme

Kundër-peticioni, njerëzit e Bashës mbledhin firmat në mbështetje të kryetarit

Autori: Gazeta inFokus 08:13 | 03 July 2017

Peticionet janë armët me të cilat do të përplasen dy rrymat e krijuara brenda Partisë Demokratike pro dhe kundër Lulzim Bashës. Pas atij që firmosën disa nga anëtarët e Kryesisë dhe Këshillit Kombëtar të PD-së, për dorëheqjen e Bashës, ka nisur të firmoset një tjetër, në mbështetje të kryetarit.

“Duke marrë shkas nga një peticion i kryer para disa ditësh nga disa pseudodemokratë, kundër kryetarit të PD-së, Zotit Basha, sot më lindi ideja që të gjithë demokratët e vërtetë dhe simpatizantët e thjeshtë të gjithë bashkë, le të nisim një peticion pro rizgjedhjes së kryetarit të PD-së, Lulzim Basha. Sot më shumë se kurrë Partia Demokratike, demokratët e vërtetë kanë nevojë për një opozitë të fortë e brilante. Kanë nevojë për një lider vizionar, europian dhe një model që të na udhëheqë drejt fitores. Ky lider është zoti Basha! Prandaj të gjithë së bashku, lë të bëhemi një zë për të treguar se Lulzim Bash aka më shumë mbështetës se Republika e Vjetër”shkruhet në peticionin pro Bashës, raporton GSH.al.

Fillimisht në Vlorë janë shpërndarë fletushka ku i bëhet thirrje simpatizantëve të Partisë Demokratike të bashkohen për të firmosur një kundër-peticion, që do të dëshmojë për mbështetjen që ka Lulzim Basha në PD.

-Advertisement-

“Nesër duke filluar nga Ora 11:00 deri në 13:00 tek Selia e PD-së në Skelë përballë Hotel Partnerit kushdo që të dëshirojë mund të firmosi Peticionin vullnetar në favor të konfirmimit të Zotit Lulzim Basha në krye të Partisë Demokratike. Peticioni do dërgohet në Tiranë tek Selia e PD dhe do i dorëzohen vetë Liderit Basha” shkruhet në thirrjen për të firmosur peticionin Pro Bashës.

Një ditë më parë u mbyllën afatet për regjistrimin e kandidatëve për kryetarë të PD-së. Veç Lulzim Bashës, kandidojnë Astrit Patozi, Eduard Selami dhe Erion Piciri.

Subscribe në YouTube: GAZETA INFOKUSI