Lajme

Kryeziu: COWEB, filtri i parë vendimmarrës në kuadër të Këshillit

Autori: Gazeta inFokus 15:32 | 24 September 2018

Grupi Punues për Vizat i Këshillit të Bashkimit Evropian (COWEB) të martën dhe të mërkurën do të qëndrojë në Kosovë për të parë nga afër progresin e institucioneve kosovare në sundimin e ligjit dhe të çështjeve tjera që kanë të bëjnë me liberalizimin e vizave.

Njohësi i integrimeve evropiane, Taulant Kryeziu, ka thënë se, COWEB është format në nivel të ekspertëve të vendeve anëtare të BE-së dhe se ky do të jetë filtri i parë i vendimmarrjes në kuadër të Këshillit.

“Ata do të jenë filtri i parë i vendimmarrjes politike që zhvillohet në kuadër të Këshillit përpara se të kalojë tek ambasadorët në COREPER për pajtim dhe në fund te Këshilli i Ministrave për miratim me atë që quhet shumicë e dyfishtë 55% e vendeve anëtare, që përfaqësojnë 65% të popullsisë”, ka deklaruar Kryeziu për “Zërin”.

-Advertisement-

Ai më tej ka thënë se sundimi i ligjit mbetet njëra nga sfidat kryesor në hapërimin evropian.

“Çdoherë kur ne japim shembuj negativë të mosrespektimit të ligjit, siç kemi bërë gjatë gjithë kësaj kohe e që është thënë dhe rithënë si vërejtje në të gjitha raportet kredibile ndërkombëtare, ku sistemi i drejtësisë nuk është i pavarur dhe politika vazhdon ta ndikojë atë në çdo mënyrë të mundshme kjo është hap pas dhe dëshmi që dëmton rëndë jo vetëm këtë proces, por krejt projektin tonë për të qenë ne një ditë vend anëtar i BE-së”, ka deklaruar Kryeziu.

Më tej ai ka thënë se është optimist se vendimmarrja do të përmbyllet këtë vit.

“Gjithsesi unë dua të jem optimist për hir të qytetarëve tanë, të rinisë tonë, të gjeneratave më të moshuara që së paku vendimmarrja të përfundojë këtë vit, duke ditur që takimet e Këshillit në përbërje të ministrave të Brendshëm ose të Drejtësisë janë më 11-12 tetor dhe më 6-7 dhjetor”, është shprehur më tej Kryeziu.

Në fund ai u ka bërë thirrje liderëve institucionalë që të përmbahen te dhënia e datave për liberalizim.

“Për datën e saktë të lëvizjes së lirë do t’i ftoja të gjithë të jenë të përmbajtur dhe të mos rrisin pritshmëritë te qytetarët sepse ky është vendim politik i vendeve të BE-së dhe ku ne ende po kemi hezitime në disa nga to si Franca, Holanda dhe Gjermania, gjë që u dëshmua edhe në votimin, i cili u zhvillua në Parlamentin Evropian”, ka përfunduar Kryeziu.

Subscribe në YouTube: GAZETA INFOKUSI
Comodita në Gjermani shpalos koleksionin e produkteve të reja në panairin Heimtextil në Frankfurt

Të tjera