Lajme

Kryetari i PDK Memli Krasniqi: Albin Kurti, show me dialogun

Autori: Gazeta inFokus 17:25 | 07 September 2021

“Albin Kurti deri tani ka pasur tendencë për të bërë show në dialogun Kosovë-Serbi”, u shpreh kryetari i ri i Partisë Demokratike të Kosovës, Memli Krasniqi, në një intervistë ekskluzive për Euronews Albania.

Sipas Krasniqit, kryeministri nga radhët e Vetëvendosje po shkon në dialogun me Serbinë me qëllime të ngjashme me ato të udhëheqësve të PDK lidhur me shkrirjen e konfliktit dhe njohjen reciproke, si dhe respektimin e sovranitetit të Kosovës.

“Unë nuk besoj se deri tash është dëshmuar nga ana e z. Kurti mjaftueshëm se ai vërtet po shkon me këtë qëllim, sepse deri tash ka pasur më shumë tendencë për të bërë një show apo për të krijuar momente përfitimi kushtimisht po them politike të brendshme në Kosovë,” deklaroi kryetari i PDK, Krasniqi.

Ai shtoi se procesi i dialogut duhet të koordinohet deri në detaje me SHBA dhe partnerët evropian me qëllime të hapura, si dhe se ‘sovraniteti shtetëror, integriteti territorial, rregullimi i brendshëm shtetëror duhet të ruhet në kuadër të këtij procesi’.

Krasniqi deklaroi se PDK do të mbështesë marrëveshjen që sjell njohjen e ndërsjellët mes Kosovës dhe Serbisë dhe që i mundëson Kosovës anëtarësimin në organizata ndërkombëtare duke filluar nga OKB.

Të tjera