Lajme

Kryeqyteti ka nevojë për më shumë semaforë

Autori: Gazeta inFokus 08:13 | 04 November 2019

Kryetari i Prishtinës, Shpend Ahmeti, kohë më parë ka paralajmëruar se në dy rrugë të kryeqytetit do të vendosen semaforë. Vlerësohet se semaforizimi i nevojshëm i rrugëve të Prishtinës do të rrisë sigurinë në komunikacion, prandaj njohësit e çështjeve të sigurisë dhe të trafikut kërkojnë më shumë sinjalizues në kryeqytet, shkruan sot gazeta “Zëri”.

Dy palë semaforë do të vendosen këtyre ditëve në rrugët e Prishtinës.

Njëri prej tyre do të vendoset në dy kryqëzimet e rrugëve “Arbënor dhe Astrit Dehari”, ndërsa në kryqëzimin e rrugëve “Xheladin Rekaliu”, “Eqrem Çabej”, “Enver Maloku” e “Hajrullah Abdullahu” do të vendoset semafori tjetër.

-Advertisement-

Këtë njoftim ditë më parë e dha i pari i Prishtinës Shpend Ahmeti, i cili bëri të ditur se këta semaforë do të vendosen me qëllim të parandalimit të aksidenteve, pasi në këto kryqëzime aksidentet janë të shpeshta.

Arsye tjetër sipas Ahmetit është edhe shkaktimi i tollovisë në komunikacion për shkak që këto rrugë janë më shumë të frekuentuara nga qytetarët.

“Këto ditë do të vendosen semaforë në kryqëzimin e rrugëve ‘Arbënor e Astrit Dehari’ dhe ‘Xheladin Rekaliu’, ‘Eqrem Çabej’, ‘Enver Maloku’ e ‘Hajrullah Abdullahu’, për shkak të qarkullimit të shtuar në drejtim të rrugës ‘Holger Pedersen’ makinat nuk i japin përparësi rrugës kryesore dhe shkaktojnë tollovi në komunikacion”, ka bërë të ditur Ahmeti.

Subscribe në YouTube: GAZETA INFOKUSI