Lajme

Kryeministri grek flet për çështjen e detit, inkurajon dialogun Prishtinë-Beograd

Autori: Gazeta inFokus 11:26 | 06 December 2022

Kryeministri i Greqisë, Kyriakos Mitsotakis, mbërriti në Tiranë për të marrë pjesë në Samitin BE-Ballkani Perëndimor.

Pas takimit me Kryeministrit Edi Rama, Mitsotakis u pyet nga gazetarët për çështjen e detit me Shqipërinë.

Ai tha se “është një çështje në diskutim e sipër mes dy vendeve, me shumë ndërlikime ligjore”.

“Mendoj se kemi bërë hapa përpara muajt e fundit dhe mendoj se ka një dakordësi mes meje dhe kryeministrit se duam ta zgjidhim këtë çështje bazuar në ligjin ndërkombëtar dhe të gjejmë një marrëveshje për firmosjen e një dokumenti që do të na lejonte që ta çonim këtë çështje në gjykatën ndërkombëtare”, deklaroi Mitsotakis.

“Jam optimist se edhe pala shqiptare do të bëjë pjesën e saj që të shkojmë sa më shpejt në këtë pikë”, shtoi kryeministri grek.

Në lidhje me situatën mes Kosovës dhe Serbisë, Mitsotakis tha se Greqia gjithmonë ka inkurajuar dialogun.

“Gjithmonë kemi inkurajuar dialogun midis Beogradit dhe Prishtinës, që duhet të zhvillohet në mirëbesim nga të dyja palët. E kuptojmë kompleksitetin e çështjes, por jemi të vetëdijshëm që duhet zgjidhur çështja dhe që të zgjidhet, të dyja palët duhet të bëjnë një hap pas. Pa u zgjidhur kjo, do të jetë e vështirë që të bëjmë progresin e nevojshëm për integrimin e Ballkanit Perëndimor në familjen evropiane”, tha ai. /Telegrafi/

Të tjera