Faqja zyrtare të Departamentit të Shtetit Amerikan ka lëshuar një njoftim të shkurtër pas takimit në Uashington, të Sekretarit Antony Blinken me krerët e shtetit të Kosovës, presidenten Vjosa Osmani dhe kryeministrin Albin Kurti.

Sipas njoftimit, Blinken ka falendëruar Kosovën për pritjen e afganëve, qëndrimin dhe mbështetjen për Ukrainën.

Gjithashtu tregohet se në takim është folur për rëndësinë e dialogut Kosovë-Serbi të lehtësuar nga BE-ja e i cili duhet ta ketë njohjen reciproke në qendër.

“Sekretari i Shtetit Antony J. Blinken ka takuar sot presidenten e Kosovës Vjosa Osmani dhe kryeministrin Albin Kurti në Uashington DC. Sekretari Blinken theksoi partneritetin e qëndrueshëm midis Shteteve të Bashkuara dhe Kosovës dhe Sekretari falënderoi liderët për mbështetjen e tyre të fortë për Ukrainën dhe pritjen bujare të afganëve. Ata diskutuan rëndësinë e dialogut të lehtësuar nga BE-ja për normalizimin e marrëdhënieve ndërmjet Kosovës dhe Serbisë, me qendër njohjen reciproke, në rrugën drejt integrimeve euroatlantike”, thuhet në njoftimin e DASH.

Pas takimit u deklarua edhe Presidentja e Kosovës, Vjosa Osmani, e ka quajtur të shkëlqyeshëm takimin me Sekretarin amerikan të Shtetit, Antony Blinken.

Ajo ka thënë se në këtë takim është konfirmuar se Republika e Kosovës nuk ka mik më të madh sesa Amerika.

“Pa përkrahjen e ShBA nuk mund të kemi sukses në organizatat ndërkombëtare që janë synimi i përhershëm yni. Kemi folur me Blinken për subjektivitetin ndërkombëtar dhe mënyrën se si Kosova fuqizohet nëpërmjet njohjeve dhe organizatave ndërkombëtare”, është shprehur Osmani.

“Kemi diskutuar edhe për rolin konstruktiv në dialogun Kosovë-Serbi. SHBA si partner që mbështesin pavarësinë, kushtetutshmërinë, gjithnjë kanë qenë të zëshëm në këtë drejtim. Si Biden edhe Blinken e kanë thënë qartë që procesi i dialogut të përqendrohet në njohje reciproke”.

Derisa, kryeministri Kurti ka deklaruar se nga Blinken kanë kërkuar më shumë investime në Kosovë dhe rritje të shkëmbimit tregtar mes Kosovës dhe SHBA-së.

“Kërkuam nga Sekretari Blinken investime amerikane në Kosovë dhe ta rrisim shkëmbimin tregtar mes dy vendeve tona”, tha Kurti.

Sipas Kurtit, takimi me Blinken ishte i përzemërt.

“Takimi që patëm me sekretarin Blinken bashkë me zonjën Presidente, ishte takim shumë i përzemërt dhe dëshmon raportet e shkëlqyera mes Kosovës dhe SHBA-së”, tha tutje kryeministri.

Po ashtu, Kurti tha se Blinkenit i treguan edhe për Kosovën si rrëfim suksesi, si rezultat i dy faktorëve.

“Treguam se si Kosova është rrëfim suksesi në mënyrë të dyfishtë, si rezultat i ndërhyrjes së NATO-s dhe së dyti i një demokracie cilësore që shkon bashkë me zhvillimin ekonomik”, deklaroi ai.

Sipas Kurtit, shteti “jo i madh” i Kosovës është një shembull i madh se demokracia dhe zhvillimi ekonomik shkojnë bashkë dhe jo ndaras, siç sipas tij, pandehin disa.

Nëse doktor Mitrev do të përdorte hemofiltrimin me qëllim që të mashtruar pacientët, do t’i kishte mashtruar të gjithë 1738…

Sponsoruar