Këshilli Prokurorial i Kosovës (KPK), me propozim të ushtruesit të detyrës së kryeprokurorit të Prokurorisë Speciale të Republikës së Kosovës (PSRK), Dren Paca, ka caktuar përkohësisht udhëheqësit e tri departamenteve të kësaj prokurorie.

Sipas vendimit, Kastriot Mema është caktuar në krye të Departamentit për Krime të Organizuar, Rafet Halimi në krye të Departamentit për Korrupsion, ndërsa Bekim Kodraliu në krye të Departamentit për Terrorizëm, raporton “Betimi për Drejtësi”.

Para marrjes së vendimit, anëtari i KPK-së, Milot Krasniqi, ka kundërshtuar caktimin e Kastriot Memës në krye të Departamentit për Krime të Organizuar, duke iu referuar kriterit sipas të cilit prokurori duhet të ketë së paku dy vjet përvojë pune në atë departament.

-Advertisement-

Ndërkaq, kryesuesi i KPK-së ka thënë se këto emërime janë të përkohshme dhe do të vlejnë deri në një vendim të mëvonshëm të Këshillit.

Gjatë këtij takimi u miratua Rregullorja për Ndryshimin dhe Plotësimin e Rregullores Nr. 04/2022 për Procedurën e Rekrutimit dhe Përzgjedhjes së Bashkëpunëtorëve Profesionalë, si dhe Rregullorja për Mbrojtjen e të Dhënave Personale në Sistemin Prokurorial.

Në këtë takim, anëtari Milot Krasniqi paraqiti Raportin Vjetor për vitin 2025 për Zbatimin e Planit Strategjik dhe Planit të Veprimit të Sistemit Prokurorial, duke renditur të arriturat, konkretisht miratimin e akteve nënligjore dhe përfundimin e procedurave të vlerësimit të performancës së prokurorëve.

Në fund, Krasniqi i paraqiti rekomandimet, duke theksuar se gjatë hartimit të këtij raporti vjetor kanë munguar disa anketa apo opinione të Këshillit.

Në anën tjetër, anëtari Visar Krasniqi tha se në fillim të vitit 2027 duhet të shqyrtohet mundësia e rishikimit të Planit të Veprimit, pasi që, sipas tij, disa objektiva tashmë janë të pamatshme.

Më pas, Këshilli miratoi kërkesën e anëtarit Milot Krasniqi për angazhimin e tij si profesor, krahas angazhimeve si anëtar i KPK-së dhe jashtë orarit të punës./BetimipërDrejtësi/

ÇMIME QË NUK BESOHEN! Comodita Home sjell oferta të jashtëzakonshme për Black Friday, me zbritje deri në 75%!

Sponsoruar

-Advertisement-