Lajme

Konfiskohen 19 pistoleta në autobusin Kosovë-Gjermani

Autori: Gazeta inFokus 09:19 | 14 August 2018

19 Pistoleta janë konfiskuar në një operacion të Policisë së Shtetit në pikën kufitare të Muriqanit. Armët sipas njoftimit të policisë së Shqipërisë janë konfiskuar në autobusin që qarkullonte nga Kosova për në Gjermani.

Sipas njoftimit pistoletat janë zënë në çantën e një 21 vjeçari i cili kishte shtetësinë e Suedisë. Policia ka publikuar edhe një video material nga çanta dhe armët e konfiskuara.

Njoftimi i plotë i Policisë së Kosovës:

-Advertisement-

Krahas masave për përballimin e fluksit, krijimin e lehtësirave ligjore me qëllim shmangien e radhëve dhe ofrimin e një shërbimi sa më cilësor e në kohë për turistët dhe gjithë pushuesit që vijnë në Shqipëri për sezonin veror, shërbimet e Policisë Kufitare Muriqan kanë rritur edhe kontrollin në drejtim të parandalimit dhe goditjes së paligjshmërisë, kryesisht trafiqeve të paligjshme që mund të kryhen duke përfituar nga fluksi i madh.

Si rezultat i shtimit të kontrolleve duke përdorur edhe qentë antidrogë dhe antieksplozivë është bërë e mundur që të konstatohet dhe goditet një rast i trafikimit të armëve të zjarrit.

Shërbimet e Policisë Kufitare në PKK Muriqan, bënë arrestimin në flagrancë të shtetasit :

– S. V, 21 vjeç, banues në Suedi.

Në PKK Muriqan në dalje gjatë kontrollit të detajuar në vijën e dytë, në çantën e 21 – vjeçarit suedez, i cili udhëtonte si pasagjer në autobuzin e linjës “Kosovë -Gjermani”, u gjetën dhe u sekuestruan në cilësinë e provës materiale 19 armë zjarri tip “pistoletë”, kalibër 7.65.

Veprimet po vijojnë nga Specialistët e Departamentit të Policisë Kriminale dhe të Policisë Shkodër për zbardhjen dhe dokumentimin e plotë të këtij rasti të trafikut të armëve.

Materialet do ti referohen Prokurorisë së Rrethit Gjyqësor Shkodër për veprën penale “Trafikimi i armëve dhe i municionit” parashikuar nga neni 278/a i Kodit Penal

Subscribe në YouTube: GAZETA INFOKUSI