Fokus

Komuna e Prishtinës hapë tenderin 350 mijë € për ta zgjidhur problemin e qenve endacakë

Autori: Gazeta inFokus 16:08 | 06 May 2022

Komuna e Prishtinës në krye me Përparim Ramën kanë planifikuar që me një buxhet prej 350 mijë euro ta zgjidhin problemin me qentë endacak, i cili tash e sa vite është bërë shqetësimi i madh për qytetarët e kryeqytetit.

Tenderi tashmë është hapur po nuk ka ndonjë përshkrim i cili tregon se si do të trajtohen qentë endacak.

Në përshkrimin e shkurtër të lëndës së kontratës thuhet se trajtimi i tyre do të bëhet sipas përshkrimit teknik të dhënë në dosjen e tenderit, e që nuk është dhënë ndonjë detaj tjetër lidhur me këtë.

Sipas dokumentit, ky tender do të jetë i hapur deri më 23 maj.

Po ashtu ky tender në bazë të dokumentit është i ndarë në disa lote e që përfshijnë disa lagje të Prishtinës dhe zona rurale të kryeqytetit.

Me këtë tender parashihet të zgjidhet problemi me qentë endacakë sipas lotit të parë në Qendër të qytetit, lagjet, Dardani, Ulpianë, Mahalla e Muhagjerëve, Kodra e Diellit, Dodona dhe Tophane.

Ndërsa në lotin e dytë, përfshihen Kalabria, zona industriale me tregun me shumicë dhe Prroi i Njelmët.

Loti i tretë përfshin lagjet: Arberia, Vranjevci, Shkabaj, Sinidoll, Bardhosh e përveç këtyre janë edhe 3 lote të tjera me të cilat sipas tenderit parashikohet trajtimi i qenve endacakë në të gjitha lagjet e Prishtinës dhe në zonat rurale.

Problemi me qentë endacak në kryeqytet është i kahmotshëm, e që çdo ditë e më shumë qytetarët po rrezikohen nga ta. Pothuajse nuk kalon ditë që në Prishtinë nuk raportohet për ndonjë person që është sulmuar nga qentë endacakë.

Institucionet lokale kanë hasur në reagime të ashpra të Organizatave Joqeveritare që merren me mbrojtjen e të drejtave të kafshëve sa i përket trajtimit brutal ku qentë endacak janë ekzekutuar.

Ndërkaq, për trajtimin e tyre, Komuna e Prishtinës në fillim të muajit prill kishte hapur edhe 18 pika të reja ushqyese për qentë endacakë në kryeqytet./Gazeta Infokus/

Të tjera