Lajme

Kompleksi fetar, Izraeli heq masat e sigurisë

Autori: Gazeta inFokus 12:24 | 27 July 2017

Të gjitha masat e sigurisë të instaluara së fundmi në një tempull në Jeruzalem, diçka që shkaktoi revoltë mes palestinezëve, u çmontuan nga policia izraelite.

Liderët fetarë palestinezë thanë se tashmë besimtarët do t’i japin fund bojkotit të kompleksit të shenjtë.

Barrierat metalike dhe skelat u hoqën të enjten në mëngjes dy ditë pasi ishin larguar që aty detektorët e metaleve.

-Advertisement-

Kriza nisi pasi në kompleks u vranë dy policë izraelitë dy javë më parë. Që atëherë ka pasur përplasje thuajse të përditshme mes forcave të sigurisë dhe palestinezëve për shkak të masave të reja të sigurisë që u morën në tempullin mal siç njihet nga hebrejtë apo Haram al Sharif, siç e njohim myslimanët.

Gjatë këtyre ditëve me përleshje nuk kanë munguar viktimat nga të dyja palët. Për palestinezët, masat e shtuara të sigurisë në tempull ishin një mënyrë që Izraeli të vendoste kontrollin e tij mbi kompleks dhe shkelte marrëveshjes për këtë zonë. Por për të qetësuar situatën, Izraeli vendosi të heqë masat e sigurisë dhe tha se ato do të zëvendësohen me metoda më të sofistikuara gjatë muajve në vazhdim.