Komandanti i KFOR-it, gjeneralmajor Angelo Ristuccia, ka takuar sot Zëvendës Sekretarin e Përgjithshëm të NATO-s në selinë e saj në Bruksel, Mircea Geoana, si dhe të gjithë ambasadorët e vendeve aleate të NATO-s dhe partnerët që kontribuojnë në KFOR.

Në fjalimin e tij pas takimit, Ristuccia ka thënë se Geoana dhe të gjithë ambasadorët kanë riafirmuar mbështetjen e tyre të fuqishme për misionin “në këto rrethana të rëndësishme për të ardhmen e Kosovës dhe për stabilitetin e rajonit”.

Ai përmendi tri pika kyçe të KFOR-it. Ndër to, Ristuccia tha se misioni që ai drejton do të ofrojë mbështetje për dialogun Kosovë-Serbi në Bruksel.

-Advertisement-

“E para: KFOR-i mbetet tërësisht i përqendruar në zbatimin e tij ditor të mandatit të dhënë nga OKB-ja. Së dyti: misioni ynë është i bazuar në kushte, jo i orientuar në bazë kalendarike. Trajektorja e tij e së ardhmen i nënshtrohet një vendimi nga Këshilli Veriatlantik – organi vendimmarrës i NATO-s. Së treti: KFOR-i do të vazhdojë të punojë për së afërmi me Bashkimin Evropian dhe të ofrojë kornizë të nevojshme të sigurisë për dialogun e lehtësuar nga BE-ja mes Beogradit dhe Prishtinës për të ecur përpara”, deklaroi komandanti i KFOR-it.

Më tej, ai tha se misioni që ai drejton mirëpret marrëveshjen e Ohrit mes Kosovës dhe Serbisë, teksa kërkoi që të zbatohen obligimet e dakorduara nga të dyja palët.

“Mirëpresim marrëveshjen e lehtësuar nga BE-ja për të normalizuar raportet mes Kosovës dhe Serbisë. Tani është thelbësore që të dyja palët të nisin zbatimin e obligimeve të tyre plotësisht dhe sa më shpejt që të jetë e mundur. Dhe të shmangin prishjen e arritjeve të rëndësishme që tashmë janë bërë”, theksoi Ristuccia.

Ndër të tjera, ai tha se si komandat i KFOR-it, ai do të vazhdojë të luajë rolin e vet në mbështetje të të gjitha përpjekjeve që kanë për qëllim krijimin e sigurisë afatgjatë për gjeneratat e ardhshme.

“Do ta bëj këtë në bashkëpunim të plotë me të gjithë aktorët relevantë dhe me të gjithë homologët e mi, përfshirë BE-në, OKB-në, OSBE-në, përfaqësuesit e institucioneve në Kosovë, dhe organizatat e sigurisë në Kosovë, dhe me Shefin e Shtabit të forcave të armatosura të Serbisë”, potencoi shefi i KFOR-it.

Në fund, Komandanti i KFOR-it, gjeneralmajor Angelo Ristuccia tha se KFOR-i do të vazhdojë ta kryejë misionin e saj dhe është plotësisht i përgatitur – në pajtim me mandatin e tij të OKB-së – të veprojë nëse stabiliteti, siguria dhe liria e lëvizjes rrezikohen për të mirën e të gjithë njerëzve që jetojnë në Kosovë, dhe për të mirën e sigurisë në mbarë Kosovën dhe stabilitetin rajonal.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-