Të dielën në Zubin Potok afër një patrulle të KFOR-it pati të shtëna me armë zjarri nga persona të panjohur, ku nuk pati të lënduar e as dëme materiale.

Për Gazetën Infokus nga KFOR kanë konfirmuar se tashmë kanë nisur hetimet për zbardhjen e të gjitha fakteve. Po ashtu është konfirmuar se janë planifikuar takime me palën kosovare dhe palën serbe për të shmangur cdo retorike që mund të ndikojë në përshkallëzim të situatës.

“KFOR-i po heton një incident indirekt zjarri më 25 dhjetor në afërsi të patrullës së KFOR-it të NATO-s. Incidenti me persona të panjohur të armatosur në zonën e Zubin Potokut. Nuk ka të lënduar apo dëme materiale dhe po punohet për zbardhjen e të gjitha fakteve. Duke qenë se janë planifikuar takime ndërmjet të gjitha palëve, është e rëndësishme që të gjithë të përfshirët të shmangin çdo retorikë apo veprim që mund të shkaktojë tensione dhe të përshkallëzojë situatën”, ka deklaruar për Infokus, zëdhënësi i misionit të KFOR në Kosovë.

Po ashtu në këtë deklaratë thuhet se KFOR-i pret që të gjithë akterët të përmbahen nga provokimet.

“Ne presim që të gjithë akterët të përmbahen nga shfaqjet provokuese të forcës dhe të kërkojnë zgjidhjen më të mirë për të garantuar sigurinë dhe sigurinë e të gjitha komuniteteve. Ne i nxisim të gjitha palët që të ndihmojnë në sigurimin dhe lirinë e lëvizjes në Kosovë dhe të parandalojnë narrativat mashtruese që të ndikojnë në procesin e dialogut”, ka thënë zëdhënësi.

Derisa ka deklaruare edhe një herë se komandanti i misionit të KFOR në Kosovë e mbështet dialogun për uljen e tensioneve dhe arritjen e një zgjidhjeje dhe ka konfirmuar se do të vazhdojnë të kryejnë misionin e tyre për të ofruar siguri.

“Komandanti i misionit të KFOR-it të udhëhequr nga NATO vazhdon të mbështesë dialogun për të gjetur një marrëveshje për të zbutur tensionet në veri të Kosovës. Ai mbetet në kontakt të ngushtë me të gjithë ata që janë përfshirë në këtë proces. KFOR-i ka shtuar praninë dhe patrullimet e tij gjatë muajve të fundit. Ne mbetemi vigjilentë dhe plotësisht të aftë për të përmbushur mandatin tonë sipas Rezolutës 1244 të vitit 1999 për të gjitha komunitetet në Kosovë. Zgjidhjet duhet të kërkohen përmes dialogut”, thuhet në këtë përgjigje.

Kujtojmë se shpërthimet në veri të Kosovës kanë nisur tash e më shumë se 10 ditë. Shpërthimi i parë me granata dore, ndodhi në objektin e KQZ-së në Zubin Potok.

“Zubin Potok 06.12-2022 – 12:30. Raportohet se zyrtarët e KQZ-se kanë shkuar në zyrat e KQZ-së dhe pasi që kanë hyrë në brendësi të objektit janë dëgjuar shpërthime. Nuk raportohet për të lënduar. Rasti është duke u hetuar”, kishin deklaruar nga Policia e Kosovës për këtë rast./Gazeta Infokus/

Oferta speciale deri në 70% dhe ekstra zbritje në dyshekët Comodita

Sponsoruar