Lajme

Këshilltari i Trumpit thotë se Kongoja e Ruanda i kanë dorëzuar propozimet për paqe

Autori: Gazeta inFokus 10:08 | 06 May 2025

Kongoja dhe Ruanda kanë dorëzuar nga një draft-propozim të marrëveshjes për paqe si pjesë e një procesi me të cilin synohet t’u jepet fund luftimeve në pjesën lindore të Kongos dhe të tërhiqen miliarda dollarë investime nga Perëndimi, tha të hënën këshilltari i lartë i presidentit Donald Trump për Afrikën, Massad Boulos.

Ky është hapi më i ri në përpjekjen ambicioze të administratës së Trumpit për t’i dhënë fund një konflikti të gjatë me dekada në rajonin e pasur me minerale si tantali, ari, kobalti, bakri e litiumi, raporton agjencia e lajmeve “Reuters”.

Muajin e kaluar, kryediplomatët e këtyre dy shteteve afrikane ishin pajtuar për dorëzimin e propozimeve për marrëveshje deri më 2 maj. Pajtimi kishte ndodhur në një ceremoni në Uashington krahas homologut të tyre amerikan, Marco Rubio.

-Advertisement-

Këshilltari Boulos tha të hënën në rrjete sociale se e mirëpriti “draft-tekstin rreth propozimit për paqe të pranuar nga Kongoja dhe Ruanda”, duke e përshkruar atë si hap të rëndësishëm drejt paqes.

Në një intervistë me agjencinë “Reuters” javën e kaluar, ky këshilltar tha se plani është që Rubio të takohet në mesin e majit në Uashington me homologët nga Kongoja e Ruanda në përpjekje për t’u pajtuar për draftin përfundimtar të marrëveshjes së paqes.

Sipas tij, para se marrëveshjet të mund të nënshkruhen, Ruanda dhe Kongoja duhet të finalizojnë marrëveshje ekonomike dypalëshe me Uashingtonin, sipas të cilave kompanitë amerikane dhe perëndimore do të investojnë miliarda dollarë në minierat kongoleze dhe në projekte infrastrukturore për mbështetjen e mihjes në të dyja vendet, përfshirë procesimin e mineraleve në Ruandë.

Më tej, këshilltari Boulos tha se ka shpresë që të tria marrëveshjet të nënshkruhen brenda rreth dy muajve dhe në të njëjtën ditë, në një ceremoni ku do të merrte pjesë edhe vetë presidenti Trump.

Subscribe në YouTube: GAZETA INFOKUSI
Çka do të thotë të gatuash shqip?
-Advertisement-

Të tjera

Fokusi

lajme