Drejtues të Shoqatës së Familjeve të Heronjve dhe Dëshmorëve tё Kombit kanë kërkuar sot nga Kuvendi zgjidhjen e statusit të veprimtarëve invalidë tё plagosur para luftës çlirimtare nё Kosovё.

Në Komisionin për të Drejtat e Njeriut, Naser Behrami nga kjo shoqatë ka prezantuar para deputetëve kërkesën që të rishikohet Ligji për Statusin e të Drejtave të Dëshmorëve dhe Invalidëve të UÇK-së që të përfshihen në këtë ligj edhe invalidët e paraluftës, gjatë periudhës 1981-1995.

Behrami duke treguar për sakrificën dhe kontributin e dhënë në atë kohë për liri dhe pavarësi, tha se në nivel vendi numri i atyre që kanë qenë të vrarë dhe të plagosur ishte 204, por sipas tij aktualisht janë rreth 120 të dëshmuar me dokumente.

“Edhe ne kemi qenë viktimë, jemi plagosur në demonstrata me plumba. Si do që të jetë kemi derdhur gjak për liri dhe pavarësi, të cilën sot ne e gëzojmë. Shteti i Kosovë ka marrë parasysh vetëm periudhën e gjatë luftës së fundit, dhe njerëzit e para luftës i ka harruar. Kërkesa e jonë e vetme, është që edhe neve të na trajtoni të barabartë sipas Ligjit dhe të na njihet statusi I invalidëve të paraluftës”, tha ai.

Veprimtari i plagosur nga forcat serbe para luftës, Xhavit Ramadani, tha se kjo kategori nuk është trajtuar asnjë herë nga shteti, derisa bëri të ditur se Fatmir Uka nga Podujeva është invalid dhe i mbetur në karrocë pa asnjë përkujdesje shtetërore.

“Numri është shumë i kufizuar, por pavarësisht kësaj qëllimi ynë është kjo të rregullohet me status çështja jonë ashtu siç na takon… Ka njerëz që janë në karrocë qe sa e sa vjet, askush nuk i trajton dhe nuk merret me problemet e tyre, pavarësisht se janë sakrifikuar për këtë liri që sot po e gëzojmë. Nuk jemi duke kërkuar privilegje, jemi duke kërkuar që të trajtohemi sikur kategoritë tjera. Pra, kategoria jonë nuk është e trajtuar fare”, tha Ramadani.

Deputetja Saranda Bogujevci ka thënë se fatkeqësisht ligji përkatës është treguar i pa drejtë për disa kategori, sidomos për invalidët e paraluftës. Derisa, theksoi se është e pakuptimtë që t’u njihet statusi i të vrarëve, por jo edhe i atyre të plagosurve në këtë periudhë.

“Fatkeqësisht elementi I plotësim ndryshimit të ligjit dhe njohës së kategorive të ndryshme ka rezultuar në shumë raste i padrejtë, por në të njëjtën kohë edhe proces I vështirë pasi në shumicën e rasteve janë trajtuar kategorive të luftës, por jo këto kategori që kanë pësuar para luftës… Është e pakuptimtë nëse iu ka njohur statusi atyre që kanë vdekur, por jo edhe atyre që kanë mbetur të gjallë dhe janë të lënduar prej periudhës së njëjtë kohore”, tha Bogujevci.

Kryesuesja e kësaj mbledhje të Komisionit, deputetja Tinka Kurti i premtoi kësaj shoqate se do t’i trajtojnë kërkesat e tyre, qoftë edhe përmes organizimit të një debati parlamentar.

Zëvendës kryetarja e këtij Komisioni, Kurti tha se historia e rezistencës nuk fillon në vitin 1998, prandaj ajo ka ka thënë se duhet adresuar kjo kategori.

“Jemi të vetëdijshëm që historia jonë e rezistencës nuk fillon në vitin ’98, pra është shumë më e hershme. Kësisoj në obligohemi t’i adresojmë ende të gjitha kategoritë e pa përfshira, që për fat të keq tash e kaq vite pas luftës e ende nuk janë të rregulluara këto kategori. Kështu që ne sot jemi t’ju dëgjojmë dhe ta adresojmë kërkesën tuaj të përsëritur brenda asaj që çka mundemi ne me bërë si deputet”, tha Kurti.

Deputetja nga PDK Eliza Hoxha ka thënë se përfshirja e kësaj kategorie me anë të rishikimit të Ligjit për Statusin e të Drejtave të Dëshmorëve dhe Invalidëve të UÇK-së do të jetë i pamundur.

Ndonëse, deputetja Hoxha tha se duhet gjetur forma tjera për trajtimin e kësaj kategori që ka kontribuar për lirinë e vendit në periudhën e para luftës së fundit.

“Për sqarim, pasi që e lexuam ligjin pak, dhe ligji ka përcaktim kohor vitin 1997-1999. Pra, kushdo që ka vdekur në atë periudhë kohore, por edhe e përcakton edhe me përqindje të lëndimeve ose statusi i viktimës civile, si dhe për dëshmorin e kombit. Për mua është me rëndësi t’iu njohët kontributi në kuptimin se çka kanë bërë për vendin… Por, në ligjin aktual nuk e shoh mundësinë që mundeni me hyrë, sepse është i specifikuar në aspektin kohor, por besoj që ka mundësi të tjera”, tha Hoxha.

Shoqata e Familjeve të Heronjve dhe Dëshmorëve tё Kombit ka parashtruar kërkese në vazhdimësi në Kuvend dhe Qeveri për njohjen e statusit të tyre me ligj.

BKT Kosova hap degën më te re në qytetin e Suharekës

Sponsoruar