“Ndonjëherë, kur një person mungon, e tërë bota duket e shpopulluar” (Lamartine). Ndërsa, “muzika është mënyra hyjnore për ta rrëfyer … gjërat poetike të zemrës” (Pablo Casals).

Kënga “Kudo të shoh ty” është rrëfim për vetminë, kur na mungon dikush, apo kur e kërkojmë veten e kur e gjejmë atë, dhe shohim që nuk është e përputhshme, në pajtueshmëri me botën, sepse mungon diçka e rëndësishme – esenciale. Është rrëfim dhembjeje, për dashurinë e humbur apo për humbjen e personit të dashur. Është rrëfim çlirimi, sepse ballafaqohet me hidhërimin – me të vërtetën. Nuk njeh gjini; nuk specifikon asgjë, por pasqyron momentin e caktuar në jetë nëpër të cilin çdokush mund të kalojë.

Sipas shumë njohësve të muzikës që e kanë dëgjuar këtë realizim, para publikimit, “Kudo të shoh ty” është këngë e pazakontë për mënyrën se si është konceptuar, konstruktuar dhe se si e përçon mesazhin. Aq më shumë që ka qenë e përfunduar më 2006, për të pritur 15 vjet, në një si test nëse mosha e ndryshon ndjesinë e një momenti, apo nëse koha shëron. Cilado qoftë e vërteta, kënga është edhe një kujtesë që na ndjek, si dikur, si sot, si nesër.

Muzikën, tekstin dhe aranzhmanin e këngës “Kudo të shoh ty” e ka bërë Agron Shala; vokalet e interpretuara me ndjesi të rrallë janë të rok-këngëtarit të mirënjohur, Bashkim Kërqeli; ndërsa kitarat e interpretuara ashtu për ta përforcuar mesazhin e temës, janë të ikonës së rokut në Kosovë, Muhamet Veseli – Muha, që ka bërë edhe miksin dhe postproduksionin e këngës.

Ndihmë në finalizimin e këtij projekti kanë dhënë edhe mjeshtri i dizajnit, Faton Hasimja; poeti i madh shqiptar, Xhevdet Bajraj; filmbërësi i pavarur, Vranin Gecaj; ikonat e rokut shqiptar, Hektor Gjurgjiali dhe Shkëlzen Veseli; si dhe multi-instrumentalisti Ilir Veseli.

Kënga tashmë është në platformat kryesore të shpërndarjes së muzikës, si Apple Music, Spotify, Amazon, Deezer, iTunes, Youtube Music …

Teksti është si më poshtë.

KUDO, TË SHOH TY!

Në dhomën tonë
I vetëm, në qosh
Hapësirë e zbrazët
Por ty, kudo të shoh

Kujtesa më flet
Zemra shpejton të vdes
Prej vetes po iki
S’e dua të t’afroj

Një hap para
Në sy më shikon
Dhe lëviz, largohesh
Unë prapë pas teje shkoj
Më humbe, u zhduke
Ku t’shkoj s’e di
Një hap prapa
I mbylli sytë
E t’shoh ty

Pa ty
Koha ndalet
Në kohët që s’janë
N’kujtimin që m’tall

Pa ty
Është një natë një ditë
Shpëtimi për mua
T’mos shoh kurrë ty
Por …

Në libra
E galeri
Në ëndrra
Fotografi
Në zemër
Në mendje
Në çmendje
Një dëshirë
Në falje
Helm, hidhërim
Në fjalë
Veç një kuptim
Çdo herë, këtu, aty
Afër e larg
Të shoh ty

Edhe sot
Vetëm jetoj
Mendjen e hapa
Dritaren kërkoj

Të shoh ty
Të shoh ty

Comodita po tërheq klientë seriozë në Panarin IMM, në Këln të Gjermanisë

Sponsoruar