Lajme

“KEDS t’i kthehet Kosovës” thonë se Rizvanolli po mban takim të fshehtë

Autori: Gazeta inFokus 13:01 | 04 Prill 2025

Sipas iniciativës “KEDS t’i kthehet Kosovës”, e cila po kundërshton shtrenjtimin e energjisë elektrike, ministrja e Ekonomisë, Artane Rizvanolli, ka thirrur një takim që, sipas tyre, është mbajtur në mënyrë jo publike.

Ata pretendojnë se takimi po zhvillohet në zyrën e ministres, ku të pranishëm janë edhe udhëheqësi i ZRrE-së, përfaqësues të KEDS-it, si dhe në mënyrë simbolike një tortë, duke aluduar në gjestin e aktivistit Dibra Hoxha ndaj Ymer Fejzullahut, shkruan Gazeta Infokus.

“Sipas nesh, bëhet fjalë për një takim privat që synon mbrojtjen e interesave të ngushta. Ministrja Rizvanolli ka ftuar këtë mbledhje me qëllim ‘kuptimin e politikave aktuale dhe të ardhshme në sektorin e energjisë, disa prej të cilave kanë implikime tarifore’. Takimi mbahet në zyrën e ministres. Temat janë aq të rëndësishme dhe gjithëpërfshirëse, sa që për ne, aty ka vend vetëm për shefin e ZRrE-së, për pronarët e KEDS-it – dhe ndoshta edhe për një copë tortë”, thuhet në reagimin e iniciativës.

-Advertisement-

“Ajo që ndodhi sot në zyrën e ministres Rizvanolli, së bashku me ‘kardinalët anonimë’, do të prodhojë ‘tymin e bardhë’. Habemus 15%!”, përfundon postimi i “KEDS t’i kthehet Kosovës”.