Kategoritë e dala nga lufta sot kanë deklaruar se nuk do të festojnë 14 vjetorin e pavarësisë së Kosovës.

Deputeti i Kuvendit të Kosovës, nga PDK-ja, Hisen Berisha përmes një deklarate publike ka thënë se i bashkohet qëndrimit të kategorive të dala nga lufta, se nuk do të jetë pjesë e kësaj ceremonie.

Sipas tij kjo sepse sa i përket organizimit kjo ceremoni përfaqëson vobektësi dhe mungesë shpirti, e që për herë të parë po festohet nga ata që nuk e shkruan pavarësinë me plumba, shkruan Gazeta Infokus.

“Si deputet që takoj edhe në komunitetin e kategorive të dala nga lufta, solidarizohem me qëndrimin  e tyre dhe përkundër vlerësimit të lartë deri në hyjnizim të kësaj dite, nuk do të jem pjesë e kësaj ceremonie, që sa i përket organizimit përfaqëson vobektësi dhe mungesë shpirti. Sakrifica e kategorive të dala nga lufta qëndron në themelet e lirisë sonë. Kjo liri i ka rrënjët në gjakun e dëshmorëve, invalidëve, viktimave të luftës dhe sakrificat e popullit për liri”, ka thënë ai.

Berisha ka bërë thirrje që të gjithë ata që sot po e festojnë 14 vjetorin të bëhen bashkë dhe të dërgojnë një urim në Dhomat Speciale në Hagë.

“Ndaj i ftoj të gjithë ata që festojnë sot, Shtetas të Republikës së Kosovës, ju që sot përvjetorin e shpalljes së shtetit sovran e të pavarur, festë që për herë të parë nuk po organizohet nga ata që pavarësinë e shkruan me plumba, ju lutem, mblidhuni dhe bëni një urim dhe dërgojeni në Dhomat Speciale në Hagë, atje ku pavarësia po mbahet e burgosur! Atje ku po provohet të na gjykohet qëllimi i luftë sonë dhe vet liria”, ka thënë ai.

Derisa nuk kanë munguar edhe kritikat për një vitin e qeverisë Kurti, për të cilën Berisha ka deklaruar se nuk erdhi asnjë njohje e re e Republikës së Kosovës e sipas tij ndodhi rrënimi plotë i ekonomisë.

“Edhe në pikëvështrimin tim, situata të cilën po e kalon ketë përvjetor Republika e Kosovës, përputhet në plotni me situatën që ka kaluar Shqipëria pas rrëzimit të Nolit nga qeverisja, vajtuar në elegjinë kushtuar Luigj Gurakuqit. Por unë nisur nga kultura ime familjare e intelektuale, nuk do t’iu lëndoj aq ashpër, të dashur bashkështetas të Republikë së Kosovës.  Mirëpo efektet e kësaj qeverisje një vjeçare (pa asnjë njohje ndërkombëtare, rrënim i plotë i ekonomisë, mos arrestim i asnjë prej “hajnave” që e “vodhën” shtetin 20 vite) ma bëjnë tepër të kjartë se fitorja e LVV në zgjedhjet e 14 Shkurtit, tërësisht e ka vra pavarësinë e Kosovës.Prandaj, Ju që do të festoni këtë përvjetor ngrihuni në përgjegjësitë politike dhe ta mbrojmë pavarësinë e Kosovës si vlerë sublime e kombit shqiptar përgjatë përpjekjeve historike për t’u çliruar nga okupimi serb”, ka thënë deputeti i PDK-së.

E asnjë urim për 14 vjetorin e pavarësisë nuk është bërë as nga Organizata e Kategorive të dala nga Lufta, OVL-UÇK./Gazeta Infokus/

Oferta speciale deri në 70% dhe ekstra zbritje në dyshekët Comodita

Sponsoruar