Sport

Juventusi e fiton derbin ndaj Lazios së shqiptarëve

Autori: Gazeta inFokus 19:56 | 25 August 2018

Juventusi e ka mundur Lazios në një ndeshje derbi të Serisë A të shtunën në Torino, me Cristiano Ronaldo që ende nuk ia ka dalë ta gjejë golin e parë në ligën elitare italiane përkundër përpjekjeve të mëdha.

Juventusi e priti Lazion në “Allianz Stadium” në kuadër të javës së dytë të edicionit të ri 2018/19 të kampionatit italian Serie A, duke e mposhtur 2-0.

Skuadrës së Max Allegrit iu deshën gjysmë ore lojë për ta gjetur golin e epërsisë, kur Miralem Pjanic u shfaq me një goditje të mrekullueshme nga largësia, e cila e mposhti Thomas Strakoshën, për t’i dhënë Juves epërsinë mbase të merituar.

-Advertisement-

Kaq kishte prej një pjese të parë të dominuar në posedim dhe me raste më të mira për vendasit.

Kampioni në fuqi ishte më i rrezikshëm edhe në pjesën e dytë duke krijuar më shumë sesa mysafirët. Mario Mandzukic ia shpërbleu mundin bashkëlojtarëve të vet kur shënoi nga një top të cilin Ronaldo dështoi ta fuste në portën e Strakoshës, në minutën e 75-të.

Pak para golit të sulmuesit kroat, Ronaldo ishte shumë pranë golit debutues në Serie A, por numri një i Lazios dhe portieri i kombëtares shqiptare Strakosha ia mohoi atë me një super pritje.

Kjo ishte fitorja e dytë në dy ndeshjet e para këtë sezon të ri për Juventusin, që tani ka 6 pikë në krye të Serisë A.

Ndërkohë, Lazio e shqiptarëve Strakosha, Valon Berisha dhe Riza Durmishi, me këta të fundit që nuk luajtën në këtë takim, e pësoi edhe humbjen e dytë, pas asaj ndaj Napolit një javë më parë, dhe mbetet pa pikë.

Subscribe në YouTube: GAZETA INFOKUSI