Fokus

Jashari: Në fillimin e javës tjetër do të nënshkruhet kontrata

Autori: Leoreta Abazi 16:41 | 14 January 2021

Pagesat shtesë ndaj sektorit të mantel bardhëve dhe sektorit të sigurisë në luftën kundër pandemisë Covid-19, ka shtyrë Sindikatën e Bashkuar të Arsimit, Shkencës dhe Kulturës të bëjë kërkesa të reja për institucionet.

Kërkesë e tyre është shpërblimi prej 100 euro për mësimdhënësit dhe nënshkrimi i kontratës kolektive për këtë sektor.

Rrahman Jashari që drejton këtë sindikatë ka treguar për kërkesat e tyre ndaj Qeverisë.

“Ne nuk kemi ngritur kërkesë pasi kemi punuar nga 13 marsi i vitit të kaluar, pasi kemi punuar online s’kemi pas kërkesa të tilla. Por me të vazhduar procesi mësimor në shkolla edhe MASHT edhe Qeveria e din që kemi një numër mjaftë të madh të të prekurve me Covid dhe pasi që shihet një rrezikshmëri e vazhdueshme për të prekur kolegët tanë edhe nxënësit me të drejtë kemi kërkuar që të votohet edhe për ne sikur për mantel bardhët dhe policinë e nderuar të Kosovës”, ka thënë Jashari.

Jashari ka bërë të ditur se i është dhënë kohë Qeverisë që të marrin vendimin për realizimin e kërkesave.

“Dje këshilli drejtues i dha edhe pak kohë dialogut duke shpresuar nga deklaratat se në këtë jave do i analizojnë këto çështje, mirëpo këshilli drejtues e ka lënë të hapur opsionin e grevës”.

Jashari është shprehur se kanë besim të madh në ministrin Likaj dhe presin realizimin e kërkesave.

“Kemi pas një bashkëpunim vërtetë të sinqertë dhe atmosferë të bashkëpunimit dhe besoj në deklaratat e tij. Ai edhe në komunikimin me ne ka thënë se është duke analizuar për vazhdën e kontratës dhe ne presim me të drejtë se në fillim të javës së ardhshme të nënshkruhet kontrata dhe kjo do të ishte moment dhe lajmi i mirë dhe do ta relaksonte situatën në procesin mësimor. Ne jemi shume të sigurte dhe besojmë në vullnetin e ministrit”, është shprehur ai.

Ndërsa për Gazetën inFokus ka treguar se në fillimin e javës tjetër do të nënshkruhet edhe kontrata.

“Presim që në fillim të javës së ardhshme të nënshkruhet kontrata dhe kjo do të ishte moment dhe lajm i mirë dhe do ta relaksonte situatën në procesin mësimor. Mirëpo presim me të drejtë që Kryeministri Hoti të gjejë kohë sepse i kemi dërguar letër dhe të ulemi të bisedojmë ti shikojmë cilat janë mundësitë buxhetore të Kosovës për ta ndihmuar arsimin”, ka përfunduar Jashari. /Gazeta inFokus/

Të tjera