“Grevë e heshtur”, kështu është shprehur kryetari i SBAShK-ut, Rrahman Jasharaj, kur është pyetur për gjendjen në arsim, duke thënë se kjo është më e keqe se greva publike, pasi nënkupton një gjendje ku punëtorët e arsimit janë të pakënaqur dhe të pamotivuar, por nuk shprehin hapur shqetësimet e tyre.

Ai ka theksuar se kjo gjendje sjell humbje të vlerave në profesionin e arsimit.

Në emisionin “Rreth e Rrotull” në RTV Dukagjini, Jasharaj ka përmendur se kjo “gjendje e pakënaqësisë” është rritur pas ndryshimeve në ligjin e pagave, veçanërisht në sektorin e arsimit.

-Advertisement-

“…Efektet e para të kësaj që e kam quajtur grevë e heshtur është pakti që edhe në Policinë e Kosovës edhe në shëndetësi, tash edhe në arsim është paraqitur si moment kur njerëzit po largohen nga profesioni i tyre, të cilët janë shkolluar dhe janë të zhgënjyer. E zhgënjimi nuk është vetëm nga një element, por edhe për shkak të ligjit të pagave”, ka deklaruar Jasharaj.

Ai ka thënë se pavarësisht premtimit të qeverisë për përmirësime, ndryshimi i koeficientit ka sjellë një rritje të vogël në pagat e arsimtarëve, duke e bërë situatën edhe më të vështirë.

“Ngase ne kishim pakënaqësi të theksuar për ligjin e pagave, por kishim shpresa që qeveria Kurti kur bën lëvizjen në koeficient lëvizja do të jetë më e dukshme, por ndodhi ajo që e kanë publikuar dhe lëvizja e koeficientit është nga 105 në 110, që në sektorin e arsimit solli një rritje ironike prej 28 euro, dhe kjo i ka shtuar edhe më shumë ato pakënaqësitë që ishin të arsyeshme me vetë ligjin e pagave”, ka thënë ai.

Për largimin e punëtorëve të arsimit nga vendi, kryetari i SBAShK-ut ka thënë se rreth 300 prej tyre kanë kërkuar pushim pa pagesë.

“Nga analizat që i kemi bërë, kemi informacionet tani që nuk mund të jenë krejt zyrtare pasi këto i kanë drejtoritë arsimore, por kishim një numër tejet alarmant, diku 300 punëtorë të arsimit kanë kërkuar pushim pa pagesë”, ka thënë ai.

Ai ka shtuar se Ministria e Arsimit ka ndërmarrë masa për të penguar këto kërkesa, por kjo, sipas tij, nuk zgjedh problemet themelore të pakënaqësisë në sektorin e arsimit.

“Kemi informacione jozyrtare se Ministria e Arsimit do ta nxjerrë një udhëzim administrativ për ta pamundësuar kërkesën e punëtorëve të arsimit pa pagesë, mirëpo me urdhra e me udhëzime administrative çështjet nuk ndryshojnë”, ka deklaruar Jasharaj.
Kryetari i SBAShK-ut ka theksuar se pakënaqësia e tyre nuk është vetëm për shkak të aspekteve ligjore, por edhe për mungesën e motivimit dhe të vlerësimit në profesionin e tyre.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-