Lajme

Iu gjetën 60 mijë euro kesh, Mujka paguhej 14 mijë euro më shumë sesa Kurti

Autori: Gazeta inFokus 12:56 | 14 July 2023

60 mijë euro kesh janë gjetur në pronën e njërit nga dy të dyshuarit për korrupsion, Faruk Mujkës dhe Hysen Muzliukajt, të arrestuar sot në një operacion të mbikëqyrur nga Prokuroria Speciale.

Prokuroria Speciale ka njoftuar se policia ka realizuar sot bastisje në pronat e Faruk Mujës, Kryeshef i “Ibër-Lepencit” dhe Hysen Muzliukajt, këshilltar i ministrit Faton Peci.

Ata dyshohen për korrupsion në kohën kur ishin pjesë e qeverisjes së Agim Bahtirit të Lëvizjes Vetëvendosje në Komunën e Mitrovicës.

-Advertisement-

Një raportim i Kallxo.com më 2023 tregon se nuk është rastësi gjetja e 60 mijë eurove kesh gjatë bastisjes së pronave të Mujkës dhe ish-drejtorit të Kadastrit në Komunën e Mitrovicës, Hysen Muzliukaj.

Zyrtari i Lëvizjes Vetëvendosje, i cili në fund të vitit të kaluar u zgjodh kryeshef i Ndërmarrjes Publike “Ibër Lepenc”, i merr dy rroga të plota: atë të kryeshefit ekzekutiv dhe të asamblistit në Kuvendin Komunal të Mitrovicës së Jugut.

Sipas deklarimit të pasurisë në Agjencinë Kundër-Korrupsion, me dy rrogat, Mujka i bie se paguhet rreth 14 mijë euro më shumë se kryeministri i vendit, dhe shefi i tij në parti, Albin Kurti.

Rroga vjetore për Faruk Mujkën, duke përfshirë edhe shtesat, për një vit arrin shumën e 31 mijë e 348 eurove. Ndërsa, kryeministri i vendit, Albin Kurti deklaroi në Agjencionin për Parandalimin e Korrupsionit del se i merr 16 mijë e 647 euro rrogë vjetore.

Sipas raportimeve të mediave, ish-nënkryetari i Mitrovicës kishte qenë pjesë e partisë së gruas së Sllobodan Millosheviqit, Mira Markoviq.

Këto pretendime, Mujka nuk i ka mohuar asnjëherë.

Tetorin e 2021-s, Mujka kishte dhënë dorëheqjen nga posti i kryetarit të degës së VV-së në Mitrovicë, por ka mbajtur funksionin e asamblistit në Kuvendin Komunal të Mitrovicës dhe anëtarit të Vetëvendosjes deri në dhjetor të vitit të kaluar kur u zgjodh kryeshef i Ibër-Lepencit.

Subscribe në YouTube: GAZETA INFOKUSI