Lajme

Ish-deputetja e VV-së anëtarësohet në LDK, Abdixhiku: Jemi bërë adresa e vetme e profesionistëve

Autori: Gazeta inFokus 12:24 | 09 January 2023

Ish-deputetja e Lëvizjes Vetëvendosje, Shqipe Pantina, nga sot është bërë pjesë e Lidhjes Demokratike të Kosovës.

Ish-deputetja Pantina që së fundmi u bë analiste e çështjeve politike i është rikthyer sërish aktivitetit të saj politik.

Lajmin për ardhjen e saj në LDK e ka bërë të ditur kreu i kësaj partie Lumir Abdixhiku.

-Advertisement-

“Jam jashtëzakonisht i lumtur për ardhjen e Shqipes në LDK. Ajo përveç se pasuron radhët tona politike, vazhdon ciklin e bashkëngjitjeve që anëtarë të jetës publike, politike, medias e shoqërisë civile po e bëjnë me LDK-në”, shkruan Abdixhiku në FB-në e tij.

Postimi i plotë i Abdixhikut:

Shqipe Pantina nga sot është pjesë e Lidhjes Demokratike të Kosovës. Ajo i bashkohet shtëpisë sonë politike si një profesioniste me përvojë të shquar në jetën publike.

Shqipja ka shërbyer për dy mandate si deputete e Kuvendit të Republikës së Kosovës. Para angazhimit politik, ajo ishte pjesë e shoqërisë civile, sikurse dhe konsulente në projekte të ndryshme ndërkombëtare me organizata prestigjioze si USAID, BE, OSBE, NDI, IFES e IREX.

Shqipja i ka të mbaruara studimet bazike në Universitetin e Prishtinës, Fakultetin e Shkencave Politike, ndërsa ka magjistruar në Universitetin e Gracit në Austri, në fushën e studimeve evropiane. Në vitin 2012 ka specializuar në Universitetin e Indianas të ShBA-ve në fushën e sistemeve zgjedhore.

Jam jashtëzakonisht i lumtur për ardhjen e Shqipes në LDK. Ajo përveç se pasuron radhët tona politike, vazhdon ciklin e bashkëngjitjeve që anëtarë të jetës publike, politike, medias e shoqërisë civile po e bëjnë me LDK-në. Lidhja Demokratike e Kosovës sot është bërë adresa e vetme e profesionistëve të tillë. Nga këtu, kështu, e kemi për obligim t’i ofrojmë qytetarëve të vendit platformë politike të denjë për rrugëtimin e ardhëm që Kosova e meriton.

Shqipe, mirë se vjen!

Subscribe në YouTube: GAZETA INFOKUSI