Komisioni Evropian të martën ka publikuar Raportin e Progresit për vitin 2021 për Kosovën.

Raporti i Progresit i Komisionit Evropian thekson se Kosova duhet të themelojë Asociacionin e Komunave me Shumicë Serbe dhe të arrijë marrëveshjen finale me Serbinë.

Komisioni Evropian, edhe këtë vit, inkurajon Qeverinë e Kosovës që të angazhohet në procesin e dialogut dhe t’i rinisë negociatat për ta arritur marrëveshjen finale me Serbinë, e cila në raport cilësohet si çështje urgjente.

Në lidhje me këtë ka folur për Front Online, ish-kryetari i Lidhjes Demokratike të Kosovës (LDK), Isa Mustafa.

Ai tha se Qeveria e Kosovës, duhet ta zbatoj ligjin përderisa është në fuqi dhe të mos merret me dokumentet e vitit 2015-të.

“Derisa Ligji është në fuqi, Qeveria obligohet ta zbatojë. Nëse nuk ka vullnet ta zbatojë atëherë duhet të merret me Ligjin jo me dokumentin e vitit 2015, sepse ai dokument nuk është as ligj, as rregullore, as statut e as dekret, nuk është akt juridik. BE nuk kërkoi zbatimin e marrëveshjes së vitit 2015 por të asaj të vitit 2013, që është ratifikuar me ligj si marrëveshje ndërkombëtare”, tha Mustafa për FrontOnline.

Pas dorëzimit të Raportit të Progresit, shefi i Zyrës së Bashkimit Evropian, Tomas Szunyog, mbajti një konferencë për media së bashku me kryeministrin, Albin Kurti.

Shefi i BE-së tha se duhet të zbatohen të gjitha marrëveshjet e kaluara të arritura në Bruksel, përfshirë edhe ajo për formimin e Asociacionit.

“Si BE dhe kjo është edhe në Raport, duhet zbatuar gjitha marrëveshjet e kaluara dhe kjo përfshinë edhe marrëveshjen e vitit 2013 për Asociacionin”, u shpreh ai.

Ndërsa, kryeministri Kurti, tha se për zbatimin e marrëveshjes së Asociacionit Gjykata Kushtetuese ka lëshuar një aktgjykim në vitin 2015-të, dhe kësaj marrëveshje i janë përgjigjur edhe 200 mijë qytetarë të Kosovës.

“Aktgjykimi i kushtetutës i publikuar me 23 dhjetor 2015 edhe peticion me mbi 200 mijë qytetar në vitin 2015 edhe fryma e kushtetues dhe institucioneve tona nuk lë hapësirë për solucione monarkike dhe kjo nuk do të thotë se ne nuk i dëgjojmë kërkesat e qytetarëve serb në Kosovë të cilat për neve janë të tjera edhe për nga forma e për nga përmbajtja me aspiratat e Beogradit. unë jam kryeministër i Kosovës dhe ju shërbej të gjithë qytetarëve pa dallim përkatësie etnike prejardhje shoqërore apo feje të caktuar, pra jam kryeministër demokrat”, është shprehur Kurti.

BKT Kosova nderohet me tre Çmime prestigjioze për qëndrueshmëri

Sponsoruar