Anëtari i PDK’së, Betim Gjoshi, ka përdorur ironinë për mënyrën e reagimit të kreut të Lëvizjes Vetëvendosje, Albin Kurti, për letrën që ia dërgoi kryeministri i Izraelit, Benjamin Netanyahu, në të cilën ftoi Kurtin për inaugurim të ambasadës së Kosovës në Izrael.

Gjoshi, me anë të ‘Facebook’-ut, ka thënë se “për përgjigje po konsultohet me atë deputetin e tij, Visar Korenicën”, duke vënë theksin në deklaratat e mëparshme të këtij të fundit karshi Izraelit.

“Albin Kurti është në diskutime të vazhdueshme për përgjigjen që do t’ia kthejë Benjamin Netanjahut të Izraelit, i cili e ftoi për inaugurimin e ambasadës së Kosovës në Jerusalem. Për përgjigje po konsultohet me atë deputetin e tij, Visar Korenicën, që bënte thirrje për zhdukjen e Izraelit nga faqja e dheut”, deklaroi zyrtari i PDK’së.

Korenica, për të cilin u raportua përgjatë ditës së sotme se i ka siguruar votat për të hyrë deputet në Kuvendin e Kosovës, kishte kërkuar zhdukjen e Izraelit, duke e quajtur atë si “fundërrinë aziatike”.

“Izraeli duhet të zhduket nga faqja e dheut!! Fundërrina aziatike në shërbim të terrorizmit islam kamikaz”, kishte shkruar në një reagim në ‘Facebook’ kandidati për deputet nga radhët e VV’së.

Kryeministri i Izraelit, Benjamin Netanyahu, në letrën e tij që i ka shkruar kreut të Lëvizjes Vetëvendosje, Albin Kurti, ka përmendur edhe marrëveshjen e fundit në mes të Kosovës dhe Izraelit dhe gjithashtu vendimin e Prishtinës zyrtare për vendosjen e Ambasadës së Republikës së Kosovës në Jerusalem.

Netanyahu në letrën e urimit, ka thënë se do të ishte i lumtur që ta mirëpriste Albin Kurtin në inaugurimin e Ambasadës së Kosovës në Jerusalem.

“E vlerësoj si shumë të rëndësishëm vendimin e Kosovës për të hapur Ambasadën në Jerusalem dhe iu pres në Izrael për inaugurimin e saj”, ka shkruar i pari i ekzekutivit izraelit.

Njohja reciproke Kosovë-Izrael ka ardhur si rezultat i marrëveshjes së Uashingtonit. Kosova ka vendosur që të vendos ambasadën në Jerusalem, gjë që ka ngjallur mjaft reagime.

Derisa nga Lëvizja Vetëvendosje për një vendim të tillë të Kosovës për vendosjen e Ambasadës në Jerusalem ka pasur qëndrime të ndryshme.

Glauk Konjufca ka thënë se nëse do të jetë kusht dhe kërkesë i Bashkimit Evropian, atëherë do ta shqyrtojnë një vendim të tillë.

Edhe Haki Abazi kishte deklaruar se qëndrimi i Bashkimit Evropian ka shumë rëndësi për Kosovën rreth asaj se ku duhet vendosur ambasada, dhe sipas tij, Kurti duhet të ulet me Brukselin dhe Izraelin për ta zgjidhur atë që Abazi e konsideron ‘nyje’.

“Është komplekse të diskutohet edhe në nivelin diplomatik se, qëndrimi i BE-së lidhur me atë se ku duhet të jetë pozicioni ambasadës, është shumë i rëndësishëm, sepse për Kosovën ka rëndësi qëndrimi i Bashkimit Evropian. Mendoj që qeveria Kurti do të ulet me sinqeritetin më të madh të bisedoj edhe me shtetin e Izraelit edhe me BE-në për të tentuar që të zgjidhet kjo nyje që është krijuar pa nevojë nga qeveria e kaluar”, ka deklaruar Haki Abazi.

Bashkimi Evropian ndërkohë e ka cilësuar si një vendim për keqardhje nga ana e Kosovës, duke qenë se Brukseli vazhdon ta njoh Tel Avivin si kryeqytet.

“Në përgjithësi, është gjithnjë e mirëseardhur kur parterët tanë të jashtëm normalizojnë raportet mes tyre. Sidoqoftë, kur është fjala e hapjes së ambasadës në Jerusalem, ky është një vendim për keqardhje i Kosovës sepse e largon Kosovën nga qëndrimet e BE-së për statusin e Jerusalemit” kishte deklaruar Peter Stano.