Inspektorati nis hetime për raportimin e policisë se 18 vjeçari u ther me thikë, në pamje u panë goditje brutale me shufër
![](https://gazetainfokus.com/wp-content/uploads/2024/01/collage-5-600x360-1.jpg)
Autori: Gazeta inFokus
12:57 | 22 January 2024
Goditjes me veturë dhe më pas goditjeve të përsëritshme me shufër në kokë nuk ka mundur t’u mbijetojë 18-vjeçari Lulzim Fejzullahu nga Podujeva, as pas një përpjekjeje 6 ditore të mjekëve në QKUK.
Nga Klinika e Intensivës kanë treguar se ai kishte lëndime të rënda e gjakderdhje në kokë, por s’kishin parë plagë therëse. Policia fillimisht e ka përshkruar rastin si therje me thikë, por pamjet e publikuara e kanë demantuar totalisht. Për këtë, Inspektorati Policor i Kosovës tashmë ka nisur një hetim.Inspektorati Policor i Kosovës ka nisur një hetim duke grumbulluar informacione për veprimet e policëve, pas vrasjes së 18-vjeçarit Lulzim Fejzullahu.
Zëdhënësi i IPK-së, Arbër Beka, i tha Gazetës Express se po mbledhin informacionet, duke përfshirë edhe shkresat e Policisë lidhur me këtë rast që u përshkrua ndryshe ditën kur ndodhi, nga çfarë treguan pamjet e publikuara dje.
“Duke ju referuar kërkesës suaj ju informojmë se lidhur me këtë rast Inspektorati Policor i Kosovës sipas detyrës zyrtare ka filluar një hetim preliminar që përfshin përveç tjerash edhe grumbullimin e informacioneve shtesë rreth veprimeve të policisë si dhe sigurimin e të gjitha shkresave lidhur me këtë rast”, tha Beka.
“Veprimet tjera do të ndërmerren varësisht nga të gjeturat e hetimit preliminar dhe autorizimeve ligjore të IPK-së”, shtoi ai.
Këtë rast, Policia në raportin 24-orësh dërguar mediave një ditë më pas, e kishte cilësuar si vrasje në tentativë, duke e përshkruar si therje me thikë.
“Podujevë 14.01.2024-13:00. Janë arrestuar dy të dyshuar meshkuj kosovarë pasi që, të njëjtit kanë therur me thikë viktimën mashkull kosovar. Viktima ka pranuar tretman mjekësor në QKMF Podujevë dhe më pas është dërguar për në QKUK Prishtinë. Njësiti policor në vendin e ngjarjes ka konfiskuar një thikë dhe një veturë. Me vendim të prokurorit dy të dyshuarit dërgohen në mbajtje”, thuhej në raport.
18-vjeçari ndiq të shtunën në Klinikën e Intensivës në QKUK, ndërsa shefi i këtij reparti, Shaqir Uka i tha Gazetës Express se te viktima nuk kanë parë plagë therëse.
“Pacienti është sjellë në njësinë e mjekimit intensiv qendror pas intervenimit kirurgjik në sallën e qendrës emergjente në urgjencë, për shkak të lëndimeve që ka pësuar në regjionin e kokës dhe ato si pasojë e gjakderdhjes që ka pësu në regjionin e kokës si pasojë e goditjeve. Nuk kemi të evidentuar, as në raportin e Qendrës Emergjente, por as ne këtu nuk kemi pa që ka pasë plagë therëse”, tha Uka.
Kur Lulzim Fejzullahu vdiq, Prokuroria Themelore e Prishtinës e përshkroi ndryshe rastin nga si ishte përshkruar nga Policia më 14 janar, duke e cilësuar tash si vrasje.
“Pas një përleshje fizike, dy të dyshuar (të mitur) e kanë goditur me një shkop viktimën (tashmë të ndjerin, 18 vjeç), duke i shkaktuar lëndime trupore, ku si pasojë e këtyre lëndimeve të marra, viktima është dërguar në QKUK për trajtim mjekësor, ndërsa po në të njëjtën ditë, me urdhër të Prokurorit të Shtetit, dy të miturit janë ndaluar për shkak të veprës penale “Vrasje në tentativë” (tashmë vrasje) dhe rasti ka filluar të trajtohet në Prokurorinë Themelore në Prishtinë”, u tha në njoftimin e Prokurorisë.
Prokurori i rastit urdhëroi që trupi i pajetë i 18-vjeçarit të dërgohej në Institutin e Mjekësisë Ligjore për obduksion.
Të nesërmen, pra dje, Policia në raportin 24-rësh e cilësoi këtë rast si vrasje e rëndë.
“VRASJE E RËNDË- Rr. Drenica, Podujevë 14.01.2024-13:00. Lidhur me rastin, me 20.01.2024 viktima mashkull kosovar i cili ka qenë duke u trajtuar në QKUK, ka ndërruar jetë. Me vendim të prokurorit, trupi i pajetë është dërguar në IML për obduksion. Rasti është duke hetuar”, u tha në raport.
Pamjet e publikuara dje dëshmuan se 18-vjeçari fillimisht ishte goditur me veturë, ndërsa më pas kishte marrë disa goditje me shufër në kokë. Pas obduksionit, ai u varros dje në varrezat e qytetit në Podujevë.
Rrahim Fejzullahu, axha i viktimës, tha dje se familjarë të të dyshuarve që tashmë ndodhen në paraburgim, i kishin dërguar njerëz. Gjyshi i njërit prej sulmuesve, siç tha ai, i kishte thënë se nipi i tij ishte therë me thikë.
“Të dyshuarit e kanë çu dikë te unë. Më shumë po ma bëjnë qeto fjalë se që kam edhe tjetër mërzi. Familja e qetij Llaushës më ka ardhë babëgjyshi në shtëpi edhe më ka thënë që edhe djali ynë është i therrur. Nuk është e vërtetë. I ke kamerat në Polici. I shfaqim këto pas ceremonisë, Policia kur t’i kryen të vetat edhe i shihni vetë. S’ka aty të therrur. Qeto fjalë po ma bëjnë… Ky tjetri, Dabinovci, më ka çu njerëz. Më ka thënë që jam në gjendje me i çu për Turqi nëse ka nevojë me i ndihmu. Po ma rrehë, po ma alivanosë e po ma shëndoshë… Nuk kam nevojë për paret tua, t’u rritë nera… Kanë lypë me ardhë sot në varrim. S’i kam leju. Jo për diçka, por nuk po mund të bëjë ballë. Shkurt, shqip”, tha ai.
Sipas familjarëve, viktima të shtunën e 13 janarit kishte pasur një mosmarrëveshje verbale me dy të dyshuarit në një rrojtore afër, për “jo s’mundesh me hy para meje, jo mundesh”, siç e përshkroi Rrahim Fejzullahu. Ai tha se atë ditë “i kanë ndërrue do fjalë jo fort të rënda mes vete”.
Sipas këtij versioni, Lulzim Fejzullahu ishte kthyer në shtëpi, ndërsa të nesërmen kishte ndodhur rasti fatal.
“I ka lanë me u qethë krejt, janë rrokë me krahë në derë, si shqiptarët që e kanë zakon me e rreh veten naltë ‘pse më rroke, pse të rroka’. Edhe ka ardhë prej shpie. Ata që e kanë rrahë djalin, më së pari e kanë përcjellë me kerr, e kanë shkelë me kerr. Të nesërmen, ditë e diel, në mesditë, në ora 12:10. E kanë përcjellë me kerr, e kanë sulmu me kerr, janë kamerat, i ka Policia. Kur e kanë shkelë, e kanë rrëzu djalin, e atëherë i kanë hipë me shufra kresë. Asnjë shenjë në trup s’e ka djali, pos në krye”. Kaq kam informacione. Mashkulli ynë dje ka ndërrue jetë, në ora 03:20. Sot e ka varrimin.”, tha axha i tij.
Lulzim Fejzullahu në moshën 4 vjeçare kishte mbetur pa njërin prind, ndërsa pak më vonë i kishte vdekur edhe tjetri. “E kam mbajtë sa kam pasë mundësi”, tregoi axha i tij.
“S’ka person që ecë me dy këmbë për rrugë të Zotit që mund ta thotë një fjalë të ligë për të. Se ky ka qenë jetim. Ky është angazhu pas shkollës së mesme, e ka përfundu shkollën, u angazhu me punu për ta bë një kafshatë bukë për vete”, tha ai. “Unë veç kërkoj drejtësi maksimale”.
![](https://gazetainfokus.com/wp-content/uploads/2024/07/Screenshot_7-3.jpg)
Të tjera
-
‘Eskavatori’ lë pa ujë disa fshatra në Vushtrri, dëmtuan një gyp gjatë punimeve në autostradë
Kompania e kontraktuar për shtrimin e autostradës Prishtinë-Mitrovicë për...
-
Fundjavë me fluks në Morinë, kosovarët për pushime në Shqipëri edhe në shtator
Edhe mëngjesi i kësaj të shtune ka nisur me fluks qytetarësh e mjetesh nga Ko...
-
Analistët: Veprimet e fundit të Serbisë në raport me Kosovën, përpjekje për destabilizim të Ballkanit
Veprimet e vazhdueshme të Serbisë në raport me Kosovën, sikurse edhe akti i f...
-
Djali i Adem Jasharit, Luli shtrihet në Kardiologji, Lladrovci: S’besoj që ta lë shenjë ty kjo
Kryetari i komunës së Drenasit, Ramiz Lladrovci, ka bërë të ditur se Lulzim J...
-
Vogëlushi i afrohet Kurtit për selfie, pasi e kryen ia vë gishtin në gjoks: Kryeministër ishte kënaqësi, çele Urën e Ibrit
Në ceremoninë e vendosjes së shtatores së presidentit historik, Ibrahim R...
-
Tre të vdẹkur sot në plazhet e Shqipërisë, dy prej tyre kosovarë
Rreth orës 14;50, në lagjen 13 në Durrës, 67-vjeçarja me iniciale A. Gj., ban...
-
Osmani: Strukturat ilegale në veri mbajnë peng integrimin e komunitetit serb
Presidentja e Kosovës, Vjosa Osmani ka pritur në takim të Ngarkuarën me Punë ...
-
Bulliqi i kundërpërgjigjet Hysenit të LDK-së: Je një mjeran politik
Kryetari i Komunës së Podujevës, Shpejtim Bulliqi, i është kundërpërgjigjur a...
-
Qendra për menaxhim kufitar del me njoftim pas hapjes së pikave kufitare
Qendra për menaxhim kombëtar ka njoftuar se janë hapur për qarkullim pikat ku...
-
Selmanaj i drejtohet Osmanit e Gërvallës: Ju guxuat të shanit LDK’në, por nuk guxuat të bëni zë kur Kurti ua shuajti partinë
Pas pranisë së kryeministrit Albin Kurti në inagurimin e shtatores së ish...
-
Sveçla: Serbia në panik, “shkolla ruse” për destabilizim të Kosovës e rajonit po dështon
Ministri i Punëve të Brendshme, Xhelal Sveçla, ka thënë se Serbisë është ...
-
Tahiri pas inaugurimit të shtatores së Ibrahim Rugovës: Lideri që nuk u lëkund, duke mbetur i përkushtuar ndaj një Kosove të lirë
Deputeti i AAK’së, Besnik Tahiri në rastin e ceremonisë së vendosjes së s...