Lajme

INDEP reagon për rrymën

Autori: Gazeta inFokus 14:28 | 24 November 2018

Instituti për Politika Zhvillimore u ka bërë thirrje Zyrës së Rregullatorit për Energji, Qeverisë dhe institucioneve të tjera të marrin masa të menjëhershme ndaj KEDS/KESCO si përgjegjës për ndërprerjet e paligjshme të furnizimit me energji elektrike.

Sipas INDEP ndërprerjet e pa arsyeshme dhe të paplanifikuara të furnizimit me energji elektrike, përbëjnë shkelje të ligjit për energjinë elektrike dhe Ligjit për mbrojtjen e konsumatorit.

“Ligji Nr. 05/L-085 për Energjinë Elektrike përcakton qartë obligimin ligjor të furnizimit universal për ndërmarrjet e caktuara të energjisë me qëllim të furnizimit të rregullt e të pandërprerë për konsumatorët. Ligji është i qartë që këtë të drejtë e gëzojnë: “të gjithë konsumatorët familjar dhe jofamiljar që kanë qarkullim vjetor jo më shumë së dhjetë (10) milion euro, ose jo më shumë së pesëdhjetë (50) punonjës”, thuhet në reagimin për mediat nga INDEP.

-Advertisement-

Sipas këtij reagimi, ndërprerjet e energjisë janë janë të paligjshme andaj Zyra e Rregullatori për Energji duhet ta shqyrtoj mundësinë e revokimit të licencës për kompaninë e furnizimit KESCO si shkelëse e obligimit që shteti i ka vënë për shërbimin universal.

Në reagim po ashtu thuhet se përmes ndërprerjeve të paligjshme të energjisë elektrike, KEDS/KESCO kanë dëmtuar një numër të madh biznesesh të cilat nuk kanë pasur mundësi të planifikojnë reduktimet.

“Përfundimisht, Zyra e Rregullatorit për Energji bashkë me mekanizmat tjerë të mbrojtjes së konsumatorit duhet të bëjnë një vlerësim të menjëhershëm të dëmeve që u janë shkaktuar qytetarëve”.

“KEDS/KESCO duhet të ndëshkohen menjëherë deri në shqyrtimin e revokimit të licencës për KESCO si shkelëse e drejtpërdrejtë e obligimit të furnizimit universal. Institucionet e Kosovës duhet të sigurojnë që i vetmi reduktim tjetër që KEDS/KESCO do të guxojnë të bëjnë është reduktimi i faturave të qytetarëve, për të kompensuar dëmin e madh që kanë shkaktuar reduktimet e rrymës. Vetëm atëherë do të rritet ndërgjegjësimi i kompanive të energjisë dhe reagimet publike ndaj tyre do të kenë kuptim e do të jenë të sinqerta”, thuhet në reagimin e INDEP!

Subscribe në YouTube: GAZETA INFOKUSI