Instituti për Politika Zhvillimore (INDEP) ka lansuar projektin “Rimëkëmbja për Qëndrueshmëri”, shkruan Gazeta Infokus. Dardan Abazi, Hulumtues i Lartë dhe Menaxher i Programit në INDEP, ka thënë se ky program ka për qëllim mbikëqyrjen e masave për të parë se sa janë në përputhje me dëmin e shkaktuar nga pandemia Covid 19 në vend.

“Projekti është në kuadër të programit të INDEP dhe synon një kontribut paralel në zbatimin e Pakos së Rimëkëmbjes ekonomike. Ne konsiderojmë që është e rëndësishme që në këtë proces të ketë sy kritik për të parë se sa po zbatohen masat, sa po ndikojnë në ringjalljen e ekonomisë së Kosovës”, ka thënë ai.

Abazi ka pasur edhe kritika ndaj Qeverisë së vendit, pasi nga këta të fundit nuk është diskutuar me qytetarët për masat e reja nga Pakoja e Ringjalljes.
“INDEP ka hartuar këtë projekt që do të përfshijë se sa janë masat në përputhje me dëmin që ju është shkaktuar sektorit të ekonomisë. Një gjë që ne e kemi parë dhe jemi të pakënaqur është fakti që Qeveria e Kosovës nuk bërë diskutim të gjerë shoqëror, nuk i ka vënë këto masa në diskutim publik ku qytetarët mund t’i dorëzonin komentet e tyre”, ka thënë Dardan Abazi.

Gjithashtu ka bërë të ditur se INDEP ka ftuar edhe ministrinë e financave që të jetë pjesë e panelit për të shpalosur në detaje pakon e rimëkëmbjes, por nga këta të fundit nuk kanë marrë asnjë përgjigje, shkruan Gazeta Infokus.

“Ne kemi ftuar ministrinë e Financave, mirëpo ndonëse i kemi pritur me javë të tëra Ministria e Financave nuk kanë treguar interesim për të qenë pjesë e këtij paneli lanësues e këtij projekti”, ka thënë Abazi.

Përveç lansimit të këtij projekti, koordinatorja e projektit, Kaltrina Rexha tha se do të lansojnë edhe projekte të tjera që do të shërbejnë në analizë të Pakos së Ringjalljes Ekonomike.

“INDEP do të publikojë edhe katër punime që do të jenë në analizën e Pakos së Ringjalljes Ekonomike dhe tri raporte monitorimi. Do të kemi diskutime sa i përket zbatimit së Pakos së Ringjalljes Ekonomike”, ka thënë Rexha.

INDEP gjatë ditës së enjte do të publikojë buletinin e dytë i cili do të jap më shumë informacione rreth masës së parë të Ringjalljes Ekonomike.
Ky aktivitet është përgatitur me mbështetjen e Balkan Trust for Democracy, një projekt i German Marshall Fund of the United States dhe USAID. Opinionet e shprehura në këtë post nuk përfaqësojnë domosdoshmërisht ato të Balkan Trust for Democracy, German Marshall Fund of the United States, USAID-it apo të Qeverisë Amerikane./Gazeta Infokus/

Infografikat:

Përsëri në shkollë me Viva Fresh Store!  

Sponsoruar